新建公屋欠配套 居民焗做開荒牛

新聞資訊 > 地產新聞 返回
瀏覽人次 : 4410
地產新聞
新建公屋欠配套 居民焗做開荒牛
(東方) 2018年6月12日
人無遠慮,必有近憂;官無遠慮,市民更加有排愁。呢,好似近年幾條新落成嘅公共屋邨咁吖,社區配套設施應有盡無,唔知嘅入到去仲以為係禁閉式難民營添呀。

立法會福利事務委員會尋日開會,有議員就鬧爆政府規劃水皮,話好多新公屋入伙經年,但區內交通、教育、福利配套通通追唔上需求,居民搭車難、返學難、生活難,仲慘過做開荒牛。勞工及福利局局長羅致光奉旨又係大耍官腔,答咗等於冇答,佢話喎,會研究點樣改善部門間嘅協調,又話其實政府有「社區投資共享基金」,幫啲新入伙家庭盡快融入社區。

呢啲咪九唔搭八囉!家陣唔係居民自己想摺埋,而係想「融入」社區都「走投無路」。好似曾經被林鄭形容為「貧窮邨」嘅沙田水泉澳邨咁吖,起喺山腰位置已經夠晒吊腳,全邨仲要得一條路出入,每逢返工返學時間,巴士埋站上客,後面車龍就塞死晒;同樣起喺山上面嘅秀茂坪安達邨,交通差唔在講,仲要即使已經有九成住戶入晒伙,區內學校仍然係塊工地,學生最快要到今年底小學落成後,先有望擺脫內地山區學童一樣嘅坎坷生活,「全港最垃圾屋邨」果然名不虛傳。

真係諗極都唔明,以前英國佬留低嘅公屋制度,本來搞得好哋哋,連新加坡國父李光耀都要嚟香港取經,照計官老爺蕭規曹隨,跟住嗰套規劃機制就實冇衰,偏偏港官連照抄都懶,起咗公屋就關人個關,到有批評聲音就掟個「社區投資共享基金」出嚟做擋箭牌,一副「有屋你住咪咁多嗲」嘅涼薄嘴臉,類似天水圍「悲情城市」嘅哀歌不絕如縷,家陣知點解喇。

唔怕唔識貨,最怕貨比貨。以前港英年代大興土木起公屋喺沙田、屯門等地發展衞星城市,規劃由零開始;家陣港府起公屋,唔理係市區牙籤樓抑或好似水泉澳邨位處山旮旯嘅屋邨,配套規劃一樣係天殘地缺,愈來愈多人懷念事頭婆時代,唔該班廢官戙高床板自己檢討吓喇!

有人就講得啱喇,公屋係用嚟住人,唔係求其塞晒啲人入去就當交咗差。嗱,咪畀人批中,公屋落成進度嚴重滯後,輪候隊伍愈來愈長,政府為咗做靚盤數,莫講話配套未足,幾乎連水泥未乾都想塞人入去住,可憐班居民出外打工搵食困難,就連有乜頭暈身㷫想搵個醫生睇吓分分鐘都要跨區至得,仲話國際大都市喎,簡直笑大人個口!

一句到尾,港府做嘢冇精神、冇靈魂,唔係將應該住人嘅公屋丟空養老鼠,就係推啲基層去做開荒牛,港官大事唔識做,小事做唔好,香港人想安居樂業都幾難。