古人話「苛政猛於虎」，道出暴政欺壓人民嘅可怕。但時移世易，呢句說話未免有啲過時，今時今日，有乜嘢比老虎更兇猛呢？仲使講，之唔係地產霸權囉。
有辦你睇，近年老牌食肆難敵天價租金，執吓一間，執吓又一間，已經買少見少。話口未完，繼有電影《花樣年華》及《2046》取景地金雀餐廳停業後，開業至今逾四十年嘅灣仔樂意扒房亦都難逃厄運，因為捱唔住貴租而將於本月底結業，扒房老闆尋日舉行「告別派對」，廣邀城中名人回味扒房美食，令人不勝唏噓無奈。
其生也榮，其死也哀。樂意扒房係唔少人嘅集體回憶，前塵往事一籮籮，九七前唔止官商名流冠蓋雲集，仲有唔少英軍及外國人慕名而至，熟客日日打躉，夜夜笙歌，基本上係唔憂做嘅。
可惜，好景不常，回歸後香港好似撞邪咁，一百八十度大逆轉由盛轉衰，打工仔實際收入不升反跌，搵朝唔得晚，邊有閒情逸致去鋸扒吖。更大劑嘅係，香港一直賴以為榮嘅國際都會金漆招牌日漸褪色，洋人較腳不在話下，弊在內地客來港亦備受歧視，一時驅蝗，一時鳩嗚，仲唔嚇到走夾唔抖咩。好嘞，即使肯貼錢買難受嚟旅遊，畢竟華洋口味有別，而且習慣多揸筷子，少動刀叉，扒房生意自然冇運行啦。
正如扒房老闆話齋，以前環境幾差都好，咬緊牙關一樣可以走出谷底，好似前年佔中影響市道，甚至沙士襲港咁大劑，咪又係一個打十個捱得過，勢估唔到過得初一，過唔到十五，過得沙士，過唔到貴租。所以話，風水佬就話呃你十年八年，李超人所講「目前香港經濟為二十年來最差」，當堂應驗晒，咪話唔濕滯。
話時話，地產霸權猛於虎，何止吞噬高檔次西式餐飲業，即使良心小店亦唔能夠幸免。嗱，好似經常免費派飯予基層及露宿者嘅「深水埗明哥」嗰間「北河點心餐廳」咁吖，業主突然大幅加租，由月租四萬元加到五萬元。係人都知，小商戶本小利微，根本冇招架之力，咁樣逆市獅子開大口加租，即係叫人執笠嘅啫。
幸好人善人欺天不欺，喺明哥頭痕之際，忽然有附近業主拔刀相助雪中送炭，以優惠價錢租個舖畀佢，慈善飯堂先得以繼續惠及區內基層o架咋，咁嘅好人好事，喺現今見錢開眼嘅勢利社會，真係好溫馨、好難得。
講到底，目前飲食業所遇嘅困境，正正係香港嘅縮影，與其坐困愁城，不如寄情老歌，惟有唱句「願明天香港也是天堂，定能看得見一點曙光。」
App下載
