樓市出更:新盤齊造勢趕春節搶客

新聞資訊 > 地產新聞 返回
瀏覽人次 : 4730
地產新聞
樓市出更:新盤齊造勢趕春節搶客
(太陽) 2016年2月4日
農曆新年前夕,發展商未見放軟手腳減慢籌備推盤步伐,相反,仲齊齊啟動密集式軟銷攻勢。新地(00016)更預告,春節後會連環推盤,其中元朗映御嘅樓書最快周內上網,農曆新年後隨即開放示範單位,有機會正月十五前開盤,同系何文田天鑄第二期就緊接喺下月初開售,示範單位最快喺農曆新年後開放。

年關將至,近排劉Sir仲好忙,每日都有唔少發展商老友話要分享下推盤進度。尋日新地代理業務部總經理張卓秀敏就帶隊入咗元朗,去睇映御位於YOHO MALL嘅路演。

雷霆:天鑄二期快睇樓

佢透露,今次路演為期一個月,首度展示樓盤模型等資料,呢一站完咗之後,會考慮喺西鐵沿線其他地點繼續路演推廣。張太仲話,映御嘅樓書有機會新春前上網,示範單位喺農曆新年後開放,最快正月十五前開售。

豪宅方面,春節後市況會相當熱鬧。新地副董事總經理雷霆話,天鑄第二期會喺下月初開售,示範單位同樓書已經積極趕製中,估計農曆新年後開放同派發。佢數番舊年開售項目第一期天鑄時,短時間賣咗逾110伙,平均每伙售價去到逾4,000萬元,平均呎價逾3萬元,第一期仲啱啱攞到入伙紙。

新地代理助理總經理胡致遠補充,天鑄第二期嘅單位面積比第一期大,全數單位都係三、四房間隔,45%仲係四房連雙套房同「L」廳設計。

長實地產投資董事黃思聰都話,馬頭角君柏會喺日內上載樓書,最快春節後開放示範單位同開價,計劃月內開售。項目228伙都係四房雙套間隔,逾八成設家庭室,售樓處將設1個連裝修及1個交樓標準示範單位,參照3座18樓A室,實用面積1,624方呎,設有家庭室。

何文田皓畋料次季推

嘉里建設(00683)何文田常盛街項目命名為皓畋,料三至四月攞到預售樓花同意書,第二季賣樓。嘉里發展執行董事朱葉培透露,項目有1,429伙,提供一至四房戶,逾85%係兩至三房間隔,兩房實用面積500餘方呎,三房戶約800至1,050方呎,項目市值近300億元。項目售價參考同區新盤同埋旗下九龍塘同何文田樓盤。

佢又話,項目位處市區,公司唔急賣,首批單位料涉唔少於300伙。

劉Sir