樓市出更:康城十期 24財團話爭

新聞資訊 > 地產新聞 返回
瀏覽人次 : 5931
地產新聞
樓市出更:康城十期 24財團話爭
(太陽) 2016年2月3日
港鐵(00066)將軍澳日出康城第十期位於臨海角落,可以話係全區位置最靚,尋日截收意向反應幾好,一共收到24份意向書,係日出康城最多意向書嘅純住宅發展期數,新地(00016)同埋會德豐地產呢啲區內有項目嘅發展商都有申請「入場券」,至於中資財團萬科置業(香港)同中國海外(00688)都有遞交,市場就估計項目嘅補價金額達約24.3億元。

港鐵公布,日出康城第十期一共收到24份意向書,公司會盡快落實有關招標安排。

劉Sir知道,好似新地、會德豐地產同埋南豐集團等已經喺日出康城「插旗」嘅發展商都有遞交意向書,項目亦吸引恒地(00012)、新世界(00017)、信置(00083)等大型發展商提交意向書。

而近年都頻頻來港投地嘅內房企業都有參與,包括有鐵路項目發展經驗嘅萬科置業(香港),公司業務部助理董事(地產發展)林力山同劉Sir講,呢個地盤位置好又有海景,會研究招標條款,相信政府會按市價釐定補地價,不過暫時未決定會唔會同其他財團合作入標。

市況差或出價保守

英皇國際(00163)同埋泛海(00129)等中小型發展商都有遞交意向。

中原張競達話,日出康城項目過去多期截收意向反應唔錯,今次亦唔例外,第十期位置臨海,對發展商具吸引力,但以現時市況嚟睇,發展商出價或較保守。

項目補價最高24億

劉Sir知道,日出康城第十期地盤面積超過8.5萬方呎,總樓面就超過81萬方呎,將會提供兩幢分層住宅,涉及單位唔超過1,170伙,預計會喺二○二二年落成,市場對項目嘅補價金額估計由約17.9億至24.3億元,即係每方呎大約2,200至3,000元。

此外,粉嶺樂業路17號開達工業中心,同埋同區安樂村安全街13號廣泰中心,早排就分別向城規會申請全幢改裝作商廈用途,規劃署均不予反對。

劉Sir