深水埗福榮街住宅地將會喺今個禮拜五截標。劉Sir屈指一算，原來同區已有超過二十年未有政府住宅地供應，不過呢個項目最「棘手」係規定咗發展商要負責重置垃圾收集站，同埋提供公眾停車場。測量師老友都覺得咁會對發展商出價構成影響，之但係作為少有嘅市區住宅地供應，佢哋相信競投反應唔會差得去邊，市場估值就約莫由13.8億元起跳。
劉Sir知道，呢幅深水埗福榮街、營盤街與福華街交界住宅地，佔地約莫3.4萬方呎，總樓面大約30.7萬方呎，其中住宅樓面佔咗大概25.6萬方呎。
公眾停車場納總樓面
今次出售條款規定咗發展商須負責重置垃圾收集站，面積大約7,986方呎，不過政府就會向發展商畀返最多5,280萬元作為建築費，另外項目亦規定要提供公眾停車場，相關嘅面積會納入總樓面內。
唔少測量師老友都覺得，呢個項目最大考慮因素係強制興建嘅垃圾收集站同埋停車場。
理想城市張聖典都咁話，對發展商嚟講，最「棘手」係要負責重置垃圾收集站，仲要等新垃圾收集站完成後三個月，舊垃圾站先會交畀發展商自行拆卸，會延長咗項目發展期，增加發展成本，佢估計每方呎樓面地價大約4,500元。計番估值大約13.8億元，係市場下限價。
美聯測量師行林子彬都話，垃圾收集站同埋公眾停車位面積要計入總樓面，發展商出價一定會反映。
鄰近港鐵站 仍屬吸引
佢話地盤位處內街，舖位價值唔算高，但講到底都係市區項目，又鄰近港鐵站，相信都可以吸引到各類發展商入標。
劉Sir發現，原來今次截標嘅福榮街住宅地，係呢區超過二十年來首幅政府住宅供應，不過，其實深水埗近年都有唔少市區重建局發展項目批出，單計過去兩年就有五個咁多，好似最近期喺舊年年底由德祥地產（00199）投到嘅深水埗海壇街需求主導項目。
而數到呢區規模最大就係長實地產（01113）前年奪得嘅深水埗海壇街／桂林街及北河街項目，擬供約877個單位。
劉Sir
App下載
