踏入一六年，發展商又再踩油大規模推盤。新世界（00017）旗下清水灣傲瀧啱啱獲批預售文件，最快首季內登場。同系上環德輔道西321號BOHEMIAN HOUSE，亦正積極部署開售，有機會同步喺首季內雙盤齊發；另恒地（00012）馬鞍山迎海第5期亦啱啱都批咗預售文件，相信短期內部署開售。
新世界營業及市務高級總監楊文尋日同劉Sir報喜，集團喺首季有機會雙盤齊發，當中傲瀧預售文件啱啱到手，樓書同示範單位正在準備當中，呢個盤提供680伙，近半係特色戶，主打實用面積約950至1,150方呎嘅三房戶，同埋面積約1,800方呎四房戶，同時設有大量複式及三複式等單位。
另外，同系與恒地合作嘅BOHEMIAN HOUSE，提供191伙，主打一房同兩房戶，都有機會首季開賣。
其實近排西貢一帶新盤市況相當熱鬧，信置（00083）營業部聯席董事田兆源透露，區內逸瓏園至今夾埋賣咗33伙，旗下同區康村路項目仲等緊批預售。
華懋銷售部總監吳崇武都話，旗下清水灣碧沙路20及22號尋晚公布銷售安排，2座洋房下月五日截標；同區銀海峯部署下周開放現樓示範單位畀傳媒參觀。
君柏娉廷趕春節前賣
至於其他發展商方面，長實地產（01113）執行董事趙國雄話，馬頭角君柏同元朗娉廷有機會喺農曆新年前同步推售。旗下元朗世宙累售696伙，套現約41億元。
嘉華國際（00173）總經理（香港地產）溫偉明期望，喺今季推售元朗朗屏8號，但仲要等埋政府批出預售文件，下半年就計劃開售啟德項目，提供至少800個單位。
啟德項目最快次季推
講開啟德發展區，中國海外地產董事總經理游偉光同劉Sir講，集團今年推售新盤料涉近1,300伙，當中啟德一號（I）及（II）夾埋有1,169伙，預計第二至三季推出；鴨脷洲南區．左岸估計都喺第二至三季推出，提供114伙。另集團下半年將開售九龍塘海棠路洋房項目。
九建（00034）市務及銷售部總經理楊聰永稱，公司今年主力開售薄扶林項目。嘉里發展執行董事朱葉培話，何文田常樂街項目料第二季獲批預售，並隨即推售。
劉Sir
App下載
