活化工廈政策即將喺明年三月底到期，唔少工廈業主都趕搭尾班車，令新申請數目顯著上升。地政總署資料顯示，今年頭十一個月共錄得34宗有關工廈整幢改裝的申請，已經打破歷來按年紀錄。有地產代理預計，剩下嘅時間會唔會有更多活化工廈申請趕搭尾班車，要視乎大型發展商取態。
發展局決定唔延長活化工廈政策，明年三月底終止接受申請，一○年四月開始為期六年的活化工廈政策將告終。
批特別豁免 銳減逾半
唔少工廈業主近月都急急腳提交申請，劉Sir翻查地政總署資料，總結今年頭11個月全港累計錄到34宗工廈整幢改裝特別豁免書申請，已經肯定打破政策實施以嚟嘅按年紀錄。
資料顯示，新申請按月數字由年中每月約2至3宗，飆升至十月份嘅7宗，而且仲追平一○年五月啱啱推行政策時嘅歷史高位，十一月數字就持續喺高位橫行，錄得6宗新申請。
不過，係上月批出嘅特別豁免書只得9份，同舊年嘅20份按年大跌超過一半。
建豐街全幢准改酒店
今年獲批項目主要嚟自觀塘區，佔3項，葵涌區亦有2項，其餘深水埗、沙田、屯門及南區各佔1項。
當中港島年內唯一獲批項目係協成行黃竹坑道Genesis，今年初起開始招租。
獲批申請個案不少申請人都係資深工商物業投資者，好似「波叔」鄧成波今年已有3項物業活化申請獲批，分別係屯門建豐街有成工業大廈，獲批改裝做酒店，提供約23萬方呎樓面；觀塘駿業街宏開工業大廈同葵涌打磚坪街成功中心，亦分別獲批改做寫字樓及商店等用途。其他投資者嘅獲批改裝工廈，亦包括金寶集團李秀恒嘅金山工業中心等，傳統大型發展商暫只有恒地（00012）九龍灣巨昇中心，年內獲批活化作寫字樓及商店等用途。
劉Sir嘅代理朋友，美聯工商董事陳偉志話，依家部分大型發展商持有具潛力改裝嘅工廈物業唔少，未來幾個月會唔會出現尾班車效應，有冇機會再推高按月申請宗數，主要視乎佢哋嘅取態；而其他投資者提出嘅活化工廈申請，佢就預計淨番唔多。
劉Sir
App下載
