臨近聖誕及新年兩大傳統消費旺季，劉Sir發現好多核心區吉舖已經被短租商戶消化，有老友代理話近日銅鑼灣駱克道一個原先由藥房租用嘅舖位，由於提早退租，利是封店趁機以約25萬元短租咗，租金只係長約叫租嘅45%，但較一般短租舖租金高兩成，反映今年短租客都幾進取。
美聯旺舖營業董事陸澤森同劉Sir講，銅鑼灣駱克道521號地舖，面積約1,000方呎，日前以約25萬元短租予利是封店，呎租約250元，租期約三個月，舖位原租客為藥房，早前以月租約51萬元租用至一八年九月，但今年九月份就已經退咗租，依家舖位長約叫租約55萬元。
陸氏話，一般嚟講短租約嘅租期唔定，租金同長約租金有好大差距，所以難判斷租金水平嘅高低，但今次租客需要在人流最暢旺嘅地段銷售利是封，所以願意以較一般短租市值高約兩成嘅金額租用上址。佢預計，未來兩至三個月正逐漸步入利是封嘅促銷檔期，料這類短租例子將會持續出現。
旺角單邊舖 15萬短租
其實近日核心區舖位空置嚴重，部分業主為減少租金損失，都願意短租出去。劉Sir最近逛街都發現利是封店積極承租核心區靚位，好似上星期同區東角道就有一個單邊舖位被利是封店以逾20萬元承租。而本周初旺角西洋菜南街與登打士街交界一個單邊地舖，亦獲利是封店以約15萬元短租，料兩舖位短租租金同樣係長租約叫租嘅三分之一。
大埔車位238萬新高
土地註冊處資料，銅鑼灣怡和街2至6號地下5號舖位連閣樓，獲銀行以月租68萬元承租，租期共六年。尖沙咀帝后廣場地庫，市傳獲買家以7,000萬元洽購。
美聯旺舖鮑昌華稱，由舖王鄧成波拆售的大埔廣場地面停車場共53個車位，於兩日內沽清，套現逾7,100萬元，有個別買家以逾1,480萬元購入11個車位，另有個別車位以238萬元沽出，創該區車位新高。
劉Sir
App下載
