近年拆細賣嘅工廈樓花好受市場歡迎，尤其葵涌區有唔少。老友代理同劉Sir講，由嘉利地產發展嘅葵涌業成街樓花工廈星星中心，尋日做到一宗呎價1萬元嘅成交，除咗創下該工廈新高，仲係新界區工廈呎價新高，同時亦啱啱有一個韓籍買家買入一個中層單位，仲話想將個單位打造到好似熱爆韓劇主角「都敏俊」嘅專屬書房。
港置工商營業董事胡信恒同劉Sir講，星星中心19樓一個特色單位，面積約311方呎，連52方呎平台，以逾310萬元沽出，呎價約1萬元，料為新界工廈呎價新高，同時呎價更高於該廈頂層單位。
另由於受到極具人氣的韓劇「來自星星的你」帶挈，該廈仲吸引咗一名韓籍嘅「星星迷」，以約220萬元購入一個中層17室單位，面積約343方呎，呎價約6,414元，胡氏仲話韓籍買家本身從事設計業，因為要放置好多設計書同參考書，所以就買入擁有4.9米特高樓底嘅星星中心單位，仲話想打造如同「都敏俊」嘅專屬書房。
藥房獲麵包店十萬頂租
劉Sir仲八到，該工廈低層全層共7個單位獲單一買家購入，面積約2,300方呎，平均呎價約6,770元，涉及金額共約1,557萬元。該項目暫累積售出約120個單位。
藥房商戶提早離場，民生商戶取而代之；尖沙咀新文華中心地下早前有藥房放頂租，面積約600方呎，最後獲麵包店以月租逾10萬元承接，較舊租為低，另金馬倫道雙號地舖，據悉原有藥房租戶於上月租約期到期後離場，舖位交吉一個月後亦獲麵包店承租。
何文田街物業六億二沽
據土地註冊處資料，何文田街5至7號以6.28億元售出，新買家為楊華強，與時代集團（01023）主席及執行董事同名，另深水埗丰匯商場地庫一籃子車位及商業部分以4.236億元售出，新買家為CITY UNIVERSITY OF HONG KONG。
另外，世邦魏理仕余錦雄話，本港房地產市場主要由私人投資者推動，一四年本港房地產市場總投資額達100億美元，私人投資者佔總投資額達61%。
劉Sir
App下載
