近排股市波動，唔少準買家吼實市場有無平盤。好似早前有個被譽為全港最平放盤嘅屯門公屋山景邨單位，喺第二市場叫價95萬元，就為部分綠表合資格準買家帶嚟希望。劉Sir最近聽聞，個單位市傳連地價以約235萬元賣出。正當大家失望之際，原來同屋苑上月底又出現一個新放盤，呢個單位第二市場叫價跌到85萬元，首期低至4.25萬元，令入市希望重現。
有代理朋友同劉Sir爆料，早排以全城至低價放售嘅山景邨4座低層戶，實用面積約294方呎，業主話單位已經賣咗，連埋地價成交價235萬元，實用呎價7,993元，其實單位補地價折扣率要成60%，所以賣呢個價都係市價。
百萬樓下 全屯門兩個
不過，大家又唔駛灰心，大市氣氛差咗，放盤價亦開始有新突破。代理話，依家屯門仲有2個叫價100萬元以下放盤，都係綠表公屋單位，其中山景邨一個實用面積同約290方呎單位，叫價最低跌到85萬元，實用呎價約2,900元。
其實新白居二就快殺入市場，都俾番少少希望班第二市場業主。
祥益胡志偉講，屯門居屋近排量跌價升，好似兆麟苑A座高層8室，八月頭放盤，雖然之後劈咗21.5萬元，以綠表價246.5萬元賣出，但實用呎價6,147元，已經創咗屯門第二場新高。
睇番房委會條數，八月暫時錄到110宗公屋同居屋第二市場成交，同七月同期一樣。其中天水圍居屋天盛苑中層單位賣386萬元，實用呎價5,937元，售價、呎價都創咗天水圍第二市場新高；而香港仔居屋嘉隆苑低層戶賣533萬元，實用呎價8,267元，都係屋苑第二市場新高。
嘉湖兩房335萬有貨
細價私樓繼續減，美聯老友講，天水圍嘉湖山莊美湖居2座低層G室減13萬元，以402萬元賣出。有代理話，呢個屋苑近排兩房戶叫價跌到335萬元都有貨。而屯門豫豐花園13座高層D室減咗20萬元，賣490萬元，實用呎價約8,642元。
中原又話，大圍金獅花園2期B座低層3室減價近10%，以335萬元賣出；而鴨脷洲海怡半島兩個星期以來錄第1宗買賣，屋苑17座低層E室減32萬元，賣1,318萬元屬低市價，實用呎價約1.5萬元。
劉Sir
App下載
