面對高樓價環境，市民置業真係要計過度過，加上上個月個股市咁波動，連居二市場啲買家都要睇定先入市。劉Sir發現七月公、居屋第二市場成交只得147宗，按月少咗23%。撇除二月春節因素，跌幅係舊年四月以來近十五個月最大。至於樓價就有升無跌，好似旺角富榮花園第二市場成交價高達630萬元，係九龍居屋新高。
劉Sir睇見房委會及房屋署嘅最新數據，七月份一共有147宗公、居屋第二市場買賣個案，比起六月明顯萎縮咗約莫23%。雖然成交係少咗，但係個價依然好硬淨，好似期間富榮花園一個實用面積592方呎中層單位，成交價去到630萬元，實用呎價10,642元，售價係九龍區第二市場新高價。
劉Sir收到風，呢個癲價單位係屋苑11座中層D室，原業主喺一○年七月用約285萬元買入，揸咗五年帳面賺約345萬元。至於香港仔逸港居有一個高層單位，實用面積592方呎，亦喺七月以545萬元賣咗。售價創咗呢個盤第二市場價新高。
山景邨四年賺六倍
嚟番今個月，個市好似又好番啲。今個月首十五日公、居屋第二市場錄到約38宗成交，比起上月同期就多咗大約65.2%，當中筲箕灣東濤苑第二市場實用呎價直逼萬元大關，該盤一個實用面積406方呎單位，以405萬元賣出，實用呎價9,980元係屋苑第二市場新高。
祥益地產李意銘話，屯門公屋山景邨近日錄到一宗綠表成交，升幅仲相當唔錯，個單位係2座高層22室，實用面積358方呎，以103.8萬元居二市場價賣咗，實用呎價約2,899元，個單位係原業主一一年八月先以約14.64萬元居二市場價買入，約四年升咗六倍，好過私樓。
瓏門一房高見530萬
私樓方面，受元朗地王效應帶動，新界西北再爆驚人高價個案。美聯謝志遠話，瓏門5座有個高層F室一房戶，實用面積374方呎，以530萬元賣出，實用呎價14,171元。劉Sir知道，呢口成交價破咗自己同YOHO MIDTOWN喺上個禮拜一齊錄得嘅520萬元舊紀錄，創咗新界西北一房單位嘅二手新高價。
中原梁潮話，元朗翠韻華庭2座低層G室，因應同區地皮高價批出，有買家加多一成預算，以448萬元成功買入個單位。
劉Sir
App下載
