今個禮拜將會有兩個元朗項目截標，其中西鐵元朗站項目會率先喺星期三打頭陣。劉Sir知道，項目採用較簡單嘅一口價招標模式，對部分發展商嚟講更加係必爭之地，相信附近有唔少項目嘅新地（00016）出價會幾進取，投到地皮嘅話，可以連貫YOHO項目第1至3期，市場估計項目成交價最高約莫74.27億元。而緊接星期五截標嘅同區牛潭尾新潭路住宅地，項目規模唔算好大，估值最多約4.07億元。
劉Sir知道，呢個西鐵元朗站上蓋發展項目，喺上個月截收發展意向時收到23份意向書，今次會繼續沿用價高者得一口價招標模式，而項目總樓面約莫148.5萬方呎，提供不少於1,876伙。
劉Sir仲八到，今次項目設有1.7億元前期工程費，而分紅比例就固定為5%，仲加設咗建築費封頂價，計算分紅時可以扣除建築費上限為64億元，即係每方呎大約4,309元。
可連貫YOHO發展
老友理想城市張聖典就同劉Sir講，呢個項目係全元朗區最具代表性嘅發展，而新界西北係將來重要發展地區，其中以元朗近年嘅發展速度最理想，而且呢個元朗站項目具有策略性，若果由新地成功投得，就可以連貫旗下嘅YOHO第1至3期發展項目。
佢仲預期，區內有項目嘅發展商出價或會比較進取，估計每方呎樓面地價可以去到約莫4,500元。折合估值約66.84億元，至於市場估值就介乎約44.56億去到74.27億元。
至於緊接喺今個禮拜五截標嘅元朗牛潭尾新潭路與碧豪苑第一街交界地皮，地盤面積就大約9.4萬方呎，提供約莫4.5萬方呎總樓面。劉Sir知道呢幅地皮附近有唔少洋房項目，好似碧豪苑、加州花園及加州豪園等。
牛潭尾地料值4億
劉Sir老友高緯環球張翹楚話，呢個牛潭尾項目規模唔算大，作為洋房發展都有一定可塑性，佢估計地皮嘅每方呎樓面地價約莫7,000元。計返估值就約莫3.17億元，綜合市場測量師意見，呢幅牛潭尾地皮估值介乎約2.71億至4.07億元。
劉Sir
App下載
