樓市出更:名店呻難頂 舖租恐尋底

新聞資訊 > 地產新聞 返回
瀏覽人次 : 8043
地產新聞
樓市出更:名店呻難頂 舖租恐尋底
(太陽) 2015年7月30日
內地股市波動,來港消費內地豪客大減,本港零售業無運行。繼Gucci表明若果租金成本未有回落,可能會關閉部分店舖後,劉Sir知道再有國際零售品牌話要業主減租,尋日LVMH財務總監Jean-Jacques Guiony話,一早已經知道香港舖租會跌,所以已經同業主檢討緊租金水平;有內地旅客就話自己喺股災中損手30至50萬元,朋友蝕得仲多,連來港旅遊都唔敢。

據外電報道,LVMH尋日公布業績,話佢哋公司今年上半年營運利潤雖按年上升15%至29.6億歐元,但喺內地、香港及澳門第二季銷售額下跌約10%。

LVMH與業主研安排

同時,LVMH香港區就因為一早估到舖租會向下調整,所以已經開始同個舖業主傾緊租金安排。其實日前另一國際品牌Gucci已經話,而家好多業主唔知市場已經變咗,如果香港區舖位租金唔減,可能會關閉部分分店,而Burberry都話,希望租金開支可以降低。

對於有部分國際品牌要求業主減租,中原工商舖董事總經理潘志明話,其實過去幾年舖位租金升幅過急,部分更以倍數上升,但近月核心區已經有舖位業主面對現實,願意減租,舖租已經跌緊,甚至回到三年前或更低水平。

而家有租戶續租時,要求業主有較大租金減幅,爭取更大生存空間同盈利能力,與業主討價還價嘅階段可以話係「尋底遊戲」,呢種情況幾時先完,要視乎零售生意會唔會好轉,料未來兩個月會進入整固期。

另外,劉Sir又八到,元朗同樂街雙號金華樓地下G舖,由藥房於去年六月以7.8萬元承租三年,惟近月因不敵零售寒冬而結束營業,而業主重新放租,獲新租戶以8萬元承租。

另同區原由藥妝店以18萬元承租至九月底的青山公路雙號地舖連閣樓,近月突然結業,業主重新以22萬元放租。

葵涌KC100租出50%

劉Sir尋日去咗參觀金寶集團主席李秀恒旗下由工廈活化作商廈嘅葵涌KC100,物業目前已租出逾50%樓面,包括法國時裝公司,創新科技公司同電訊公司,平均呎租逾20元;佢又話,會向政府申請大廈對出空地作為文化創意展覽中心,到時會免費租畀文化界人士。

劉Sir