近排股市咁波動，但係豪宅市場都依然有啲億億聲成交，做價仲相當理想，地產界老友同劉Sir講，接近3年未聞成交嘅中半山港景別墅，啱啱有個單位以約1.15億元賣出，實用呎價約5.83萬元，估計創咗中半山二手標準戶新高。至於超過一年無成交嘅南區皇府灣，據聞都有一幢洋房以約8,800萬元賣咗。
聽地產界老友講，今個月二手豪宅交投雖然少咗，但啲價仍然好堅穩，一啲罕有嘅物業都錄到成交，好似單位景靚、地段又好嘅港景別墅，啲業主一向惜售，啱啱有個實用面積約1,971方呎嘅B室，以約1.15億元賣出，實用呎價約5.83萬元，估計創咗中半山二手標準戶新高。
而同區複式單位依家實用呎價已經突破咗6萬元，好似一二年以1.88億元賣出嘅君珀一手複式戶，實用呎價約6.47萬元。
至於皇府灣，聽市場人士講，有一幢實用面積約2,507方呎洋房，以約8,800萬元賣出，實用呎價約3.51萬元；呢個盤對上一宗成交要追溯到舊年年中，當時有幢雙號大屋以1.2億元賣咗。
約道洋房地價料貴絕
講開罕有物業，九龍塘約道一幢洋房獲買家洽購，以物業可建樓面計，市傳每方呎樓面地價約4.9萬元，若交易落實，有望創區內獨立洋房新高。
今個月分層豪宅成交，以3,000萬元以下個案為主，中原梁植霖話，荔枝角曼克頓山6座高層B室，實用面積1,135方呎，單位座向東南，最近以2,168萬元連車位賣出，實用呎價約1.91萬元，原業主揸咗個單位五年幾，帳面賺約588萬元。
該行謝家哲話，西區寶翠園今個月暫時錄到約3宗成交，平均實用呎價20,123元，其中3座中層G室，實用面積751方呎，望尖沙咀方向，以1,568萬元連租約賣咗，實用呎價約2.09萬元。
聽市場人士講，何文田帝庭園6座低層C室，實用面積約948方呎，以約1,520萬元售出，實用呎價約1.6萬元。
擎天8年升值六成
利嘉閣顏廷軒話，九龍站擎天半島今個月到依家有約3宗買賣，近期5座中層A室，實用面積620方呎，由買家以1,360萬元買入，實用呎價約2.19萬元，個單位8年升值約63%。
中原鄧國昌話，港島南貝沙灣今月有6宗成交，當中有3宗喺本月初股市暴跌之後錄到，睇到買家對豪宅入市信心都唔錯，近日屋苑有個4期6座中層B室，以1,616.8萬元連車位賣出，實用呎價2.24萬元。
劉Sir
App下載
