樓市出更:學生包租公回報可觀

新聞資訊 > 地產新聞 返回
瀏覽人次 : 9250
地產新聞
樓市出更:學生包租公回報可觀
(太陽) 2015年7月21日
大學宿位不足,劉Sir知道有3個本港大學生睇準時機,成立網站「漂樂居」,利用互聯網做平台,將早前大包租形式承租嘅一批單位,分拆床位分租畀未有宿位嘅非本地學生。喺今個暑假佢哋就投資咗過百萬元承租各區住宅,沙田同大圍佔約一半,喺短短兩個禮拜已經租咗約30個租盤,佔大包租單位嘅八成,涉及80至90個非本地學生租客,估計呢個計劃回報率有10%咁高。

尋日「漂樂居」網站創辦人之一、依家重喺科技大學讀緊工業工程系3年級嘅90後林駿銘同劉Sir講,喺舊年已經有呢個構思,創立一個大學生互聯網平台,再承租鄰近大專院校嘅租盤,然後拆細畀冇宿位或畢業咗但留喺香港嘅非本地學生,等佢哋夾份租單位住。

內地大學生佔七成

佢仲話,知道賺錢唔多,但希望幫到部分搵唔到宿位嘅非本地學生,佢哋承租咗嘅屋苑有沙田第一城、大圍名城、紅磡海濱南岸及將軍澳東港城等,透過網站將單位分拆租出去,好似每個床位月租介乎2,000至6,000元。

而家有約80至90個非本地學生已經網站成功搵到床位,當中六至七成係內地學生,其餘來自日本及韓國等地區,涉及月租約50萬元。

林同學舉例,網站承租嘅一個大圍名城四房單位,實用面積約1,300方呎,由六名非本地學生分租,每名學生月租約3,000至5,900元,月租共約2.8萬元,較市值租金約2.6萬元為高。

今次佢哋搵咗Q房網香港做顧問;Q房網董事總經理陳坤興話,公司受漂樂居委託作做租務顧問,而每個單位嘅業主都知道單位會分拆出租。

名城高市價6%租出

踏入暑假租賃旺季,唔少內地學生四出搶租,中原林旭樂話,名城有唔少內地學生租樓個案,最新錄得嘅名城1座南翼高層A室,實用面積679方呎,由4名內地學生夾份以每月2.55萬元承租,比起市值租金高約6%,實用呎租約37.6元。

該行杜文俊話,沙田市中心剛過去周末連錄4宗內地學生承租個案,包括偉華中心4座低層B室,成交月租1.36萬元。

美聯布少明話,今年上半年租務市場1萬元或以下嘅住宅租務比率佔整體僅約11.1%,料未來將會跌穿10%水平。

劉Sir