新白居二未到，不過近排第二市場樓價已率先炒起。劉Sir數數手指，近呢四個月居屋綠表做價至少已經四度破頂，六月份筲箕灣東旭苑有個海景戶以668萬元賣出，成為最新居二樓王。而上半年居二市場錄到約931宗買賣，比舊年同期跌逾44%。
睇番房委會資料，東旭苑有個高層單位，實用面積650方呎，上個月喺第二市場以668萬元賣出，實用呎價逾1.02萬元。聽代理講，呢個單位係C座高層5室，擁海景連裝修，以三房間隔，幾個星期前以680萬元放盤，缺盤之下比嚟自港島東區嘅買家買入，實用呎價10,277元，單位○一年購入價約195萬元。
居二市場成交挫44%
據聞，呢個單位補價折扣率約46%，若果計埋補價，售價估計接近千萬元，而今次成交價再創第二市場新高，比五月時筲箕灣東濤苑舊紀錄648萬元，再高咗20萬元，而由三月至六月期間，居屋第二市場成交價已經四度破頂。
六月公屋及居屋第二市場錄186宗成交，比五月份少25宗，七月暫錄23宗：六月份黃大仙公屋竹園北邨有高層戶以實用呎價5,978元售出。料創屋苑第二市場呎價新高。
總結上半年，全港第二市場錄到約931宗成交，相比舊年上、下半年分別少咗約44.4%及17.2%，其中筲箕灣居屋愛蝶灣六月平均實用呎價約9,317元，半年升咗超過18%。
最近居二市場出現多按銀主盤，紀惠集團副主席及行政總裁湯文亮在網誌話，早前股市下跌，部分貸款業主投資失利影響，欠債百上加斤，面對財務公司收樓都無能為力。而爆煲，要嚟的始終會嚟。
新居屋再錄撻訂，房委會資料，沙田新居屋美柏苑17樓2室，原先成交價232.73萬元，昨日撤銷買賣協議。
嘉湖實呎越九千關
私樓最近亦頻錄高價，天水圍嘉湖山莊兩房戶實用呎價首破9,000元，估計創咗屋苑標準分層戶新高。
美聯朱若珊話，嘉湖山莊美湖居2座高層F室，實用面積441方呎，獲上車買家以398萬元購入，實用呎價9,025元。中原黃達雄話，大埔中心6座高層H室，售580萬元，實用呎價12,860元，高市價10%。
此外，名采策略姚雲龍稱，投資者黎汝遠揸住嘅北角城市花園5座中層D室，叫價1,900萬元放盤數年，終減220萬元，以1,680萬元連租約沽出，低市價8%。
劉Sir
App下載
