樓市出更:馬頭角項目勁收20標

新聞資訊 > 地產新聞 返回
瀏覽人次 : 6063
地產新聞
樓市出更:馬頭角項目勁收20標
(太陽) 2015年7月15日
市區重建局馬頭角北帝街/新山道項目尋日截標,由於項目「細細粒容易食」,加上沙中線鐵路效應,吸引各類型嘅發展商入標,總共收到20份標書,成為該局歷來最多標書嘅發展項目。

市建局早前全數邀請晒32家有份遞交意向書嘅財團入標,競投北帝街/新山道項目,尋日截標反應相當熱烈,項目屬市區罕有住宅地皮,提供160伙,市場估值最高約莫7.42億元。

長實新地出手競逐

市建局發言人同劉Sir講,今次總共收到20份標書,係該局歷來最多標書嘅市區重建項目。翻查資料,舊紀錄係○四年深水埗福榮街/福華街合作發展項目創出16份標書的紀錄,該項目最後由信置(00083)投得,發展》為今日嘅海峯。市建局話招標遴選小組會評審每份標書,又會就批出項目發展協議向市建局董事會提交建議,由董事會作出最終決定。

今次入標財團除長實地產(00113)、新地(00016)、新世界(00017)等大型發展商外,仲吸引一眾中小型發展商,好似香港小輪(00050)、永泰(00369)等都有份競逐,英皇(00163)就夥拍世房(00813)合組財團參戰,而莊士中國(00298)則聯同新加坡鴻福合資競投。

首5月動工量增兩倍

獨資入標嘅遠東發展(00035),公司地產發展部總經理朱寶林就話,呢個項目嘅商業部分發展潛力大,會着重發展。同樣獨資入標嘅K&K Property,該公司代表話,未來呢區會有好多舊樓拆卸,新樓供應愈來愈多,慢慢取代啲舊樓,又話中小型單位需求大,市場可以吸納到。

劉Sir睇返屋宇署數據,今年頭五個月累積動工量已達7,788伙,較去年同期2,592伙勁增兩倍,期間全港有26個私宅項目動工,而當中新界區供應最多單位,涉及7個項目、合共3,615個單位,佔整體約46.4%。

另五月批出咗12份住宅建築圖則,當中屯門佔2個,涉及樓面共逾17.13萬方呎。

劉Sir