未來港島核心區甲級商廈供應仍然短缺，帶動成交價屢創新高，港交所（00388）剛趁勢將自用嘅中環環球大廈17樓以近5.1億元沽出，呎價高達30,500元，創該廈呎價新高，亦係全港商廈次高。新買家係永光地產，該公司總經理鄺德權同劉Sir講，成交價「唔算貴，屬合理價」。同時有老牌業主見市道好，放售灣仔會展中心中層全層單位，意向呎價更高達4萬元，如果成交，勢創本港商廈呎價最高。
港交所發言人同劉Sir講，持有的環球大廈17樓全層，已經與買家簽訂臨時買賣合約，而今次買賣涉及售後租回形式，租期最多九個月。
永光地產購入或放租
而永光地產鄺德權就亦同劉Sir講，今次成交價近5.1億元，呎價約30,500元，覺得中環區商廈供應始終寥寥可數，而且近排租金高企，覺得今次成交價屬合理價，單位可能用作公司總部或收租，不過暫時未有定案。
劉Sir仲知道，上述環球大廈全層面積約1.67萬方呎，而今次呎價約30,500元，創咗該廈呎價新高，同時係全港商廈呎價第二高，最高紀錄就係同區皇后大道中九號一個高層全層單位，呎價近3.5萬元。
會展全層意向價6.6億
據土地註冊處資料，港交所或有關公司於九一年以約8,300萬元購入上述環球大廈單位，現帳面升值逾4.2億元，升幅逾五倍。
商廈業主亦趁勢高價放盤，美聯區域營業董事麥世強話，灣仔會展中心30樓全層，面積約16,518方呎，以呎價4萬元放售，意向價約6.6億元，而家有3名租戶租緊該樓層四分之一樓面，該廈已經無其他全層放盤單位，所以非常罕有。據悉業主係老牌實業家。
中原陳偉良話，中環歐陸貿易中心高層全層交吉放租，面積約5,261方呎，意向月租約28.9萬元，較早前叫租調低約8.3%。
世邦魏理仕報告指出，香港喺一五年首季繼續成為全球最貴核心區舖租的市場，呎租約2,800元，按季相若，緊隨為紐約及巴黎，呎租分別達2,351元及858元，分別按季上升0.5%及0.34%。
另方面，本港零售核心區旺角西洋菜南街吉舖依然維持相當數目，區內恒隆地產（00101）的家樂坊商場將進行優化工程，租予單一時裝品牌。
劉Sir
App下載
