屯門掃管笏再有「準地王」喺今個禮拜五截標，今次截標嘅屯門第56區掃管笏路住宅地，提供超過84萬方呎樓面，市場估值最高去到43.77億元，有機會打破今個月中鄰近管翠路創出嘅36.289億元紀錄，成為屯門區地價最高地皮。劉Sir覺得，喺區內有項目嘅新地（00016）、恒地（00012）同埋會德豐地產都有機會入標。
劉Sir知道，呢幅屯門掃管笏路住宅地，佔地約莫29萬方呎，總樓面就大約84.2萬方呎，當中包括興建一所面積約9,580方呎嘅幼稚園，總樓面就略多過最近批出嘅鄰近管翠路地王，而地皮嘅高限係主水平基準以上90米，並須於二○二二年三月底前落成。
近海景靚 周五截標
今次呢幅地有番咁上下規模，地價有力問鼎屯門新地王寶座，劉Sir老友高緯環球張翹楚就話，掃管笏嘅位置近海，所以景觀一般比較好，但區內已經有唔少住宅供應，但係長遠嚟睇，掃管笏可以發展嘅空間唔多，預計項目每方呎樓面地價可以去到5,200元，計番估值就大約43.77億元，係市場目前嘅估值上限。
其實屯門區近排先有新地王批出，鄰近嘅管翠路住宅地喺今個月中以36.289億元批出，刷新屯門地價新高紀錄。如果即將截標嘅掃管笏路住地宅，最後真係順利以上述估價批出，就會極速改寫紀錄，成為區內新地王。
劉Sir估計，啱啱奪得管翠路地皮嘅恒地、同埋區內有發展項目嘅新地同會德豐地產，都會有機會參與競投。
斜坡有墳 吸引力降
不過，都有測量師覺得呢幅掃管笏路地皮嘅地價，未必及得上新近批出嘅管翠路地王，理想城市張聖典話，中標財團除咗要負責興建幼稚園，亦需負責維修同埋保養項目範圍內嘅斜坡，仲要移除現存嘅部分排污設施，而鄰近嘅斜坡亦有墳地。佢預計，項目可作中低密度豪宅發展，預計每方呎樓面地價大概4,000元，估值約33.7億元。
劉Sir
App下載
