近期非核心區舖市逆市做好，連發展商都睇好，劉Sir知道億京三年前以每方呎樓面地價約1,470元，向政府投得嘅天水圍酒店及商業地皮，其中商場部分已「賣得」，入場呎價達4萬元，有機會係區內呎價最高物業，料項目可於今年秋季取得入伙紙及滿意紙。
億京發展項目籌劃經理黎裕宗話，天水圍酒店及商場項目，其中樓面約20萬方呎嘅商場部分已經「賣得」，有約250個舖位，舖位面積約200至1萬方呎，意向呎價約4萬元起。劉Sir睇番資料，其實上年同區拆售舖位嘅嘉湖新城商場，平均呎價2萬餘元，個別呎價先逾4萬元，所以呢個新商場入場呎價有機會係成個區嘅新高。
酒店部分市值逾10億
佢又話，約340個房間嘅酒店部分，就依然有4至5組買家洽購緊，每個房間意向價300萬元，意味着酒店部分市值已經超過10億元。而旗下新蒲崗大友街商廈項目將於兩個月內取得預售書。
而開賣咗兩個月嘅觀塘三寶，其中駿業街56號分別售出約25至30%樓面，加埋套現約37億元，沽出嘅主要係商舖；項目地下至2樓、11樓至18樓為商舖樓面，設101個舖位，意向呎價10,850元起；而20至39樓寫字樓部分，每層面積約15,594方呎，設154個單位，意向呎價10,250元起。美聯工商舖行政總裁黃漢成話，觀塘區零售樓面不足，欠大型商場，所以區內樓上舖一直受大眾歡迎。
對於東九龍發展，黎裕宗就話，每逢周六、日，區內食肆旺場，旗下成業街10號的商場一間設有90個座位嘅荼餐廳，一個午市竟可招待「五轉」客人，吸引500名食客，早前已經有投資者有感商場呎價低水Full Pay（一次過付款）入市。
四叔商廈翻新 月內售
劉Sir噚日仲參觀咗由「四叔」李兆基私人持有嘅西營盤翻新商廈項目威華商業中心。恒地營業（二）部總經理韓家輝話，項目翻新費近1億元，市值逾10億元，已經賣出5個單位，餘下115個單位分布於3至26樓，每層提供5個單位。
佢仲話其中4個單位設獨立廁所，建築面積500至700方呎，料月內推售首批單位，售價參考中環沿線附近嘅寫字樓。地下至2樓商舖或餐飲層或會保留收租。
劉Sir
App下載
