近排公屋買賣成為市場嘅焦點，市民置業心切，高價個案一個接一個，扯高第二市場實用呎價。劉Sir睇到代理一份報告，原來今年截至四月底嘅第二市場公屋成交，實用呎價4,000至5,999元嘅成交佔咗78.7%，比起舊年下半年勁升25.3個百分點，期間以鴨脷洲利東邨單位嘅第二市場實用呎價最高，錄約6,377元。
今年樓價保持升勢，特別係涉及銀碼細嘅公屋單位，成交呎價紀錄不斷被推高。劉Sir老友中原黃良昇就話，今年截至四月底嘅第二市場公屋成交，佔78.7%成交單位，實用呎價4,000至5,999元，比率較舊年下半年嘅53.4%，大幅高出25.3個百分點，按年比較更加高咗32.7個百分點。
期間利東邨一個中層單位，實用面積381方呎，成交實用呎價高達6,377元，係本港首個實用呎價升穿6,000元嘅第二市場公屋成交。但劉Sir知道，呢個紀錄今個月已經畀青衣長安邨極速打破，有單位成交實用呎價高達7,562元。
二千元樓下成絕響
至於今年頭四個月實用呎價介乎2,000至3,999元嘅成交，只係得約莫20%，對比舊年下半年勁跌26.1個百分點。黃良昇話，今年頭四個月已經無晒實用呎價低過2,000元嘅二市場公屋成交，而舊年都仲有兩宗，分別係元朗朗屏邨中層單位同埋將軍澳翠林邨高層單位。
其實公屋真係幾受歡迎，劉Sir知道最近公屋市場有唔少成交，中原陳國威話，屯門山景邨景麗樓高層2室，實用面積296方呎，自由市場成交價195萬元，實用呎價6,588元。
居屋新圍苑398萬沽
居屋市場買賣亦見穩定，市場仲錄到高價個案，家天下黎振傑話，旺角富榮花園12座高層K室，實用面積431方呎，綠表成交價383萬元，平了同類新高紀錄。
另外，祥益胡志偉表示，屯門居屋新圍苑C座高層1室三房，實用面積554方呎，連補地價以398萬元售出，實用呎價7,184元，創同類售價及呎價新高。
App下載
