政府近年都維持住穩定嘅土地供應步伐，唔少係來自屯門區，嚟緊今個禮拜五截標嘅屯門第16區海榮路與恒富街交界住宅地，係今個財政年度賣地計劃嘅首幅截標地皮。由於呢幅地皮可作住宅同埋商業混合發展，測量師老友都覺得會有唔錯嘅競投反應，預計可以收到逾10份標書，地皮市場估值最高約莫14.18億元。
劉Sir知道，今季賣地計劃推出嘅5幅住宅地，其中屯門地皮就佔咗3幅，先由上述屯門海榮路地皮打頭陣，嚟緊周五截標，呢幅地面積大約5.2萬方呎，可建樓面最多約35.46萬方呎，包括約20.49萬方呎嘅住宅樓面，同埋最多約14.97萬方呎嘅商業樓面，而地皮無加設單位數目限制。
其實具備商業元素嘅住宅地不嬲都好受追捧，劉Sir老友理想城市張聖典就話，屯門海榮路地皮享有海景，而項目最低嘅三層可以用作商業發展，相信地價會反映佢嘅合理商業價值。
周五截標 呎價料四千
佢預計項目可以吸引超過10家財團入標競投，至於每方呎樓面地價就估約4,000元。計番估值大約14.18億元，係依家市場嘅上限價。
劉Sir另一個老友天俊測量師行張楚然都覺得，呢幅本周五截標嘅地皮，日後部分單位有享海景，而且區內環境清靜，有一定吸引力，美中不足係地形唔夠方正，剪裁上有難度，佢預計每方呎樓面地價約莫3,449元。用最大樓面計估值就大約12.23億元，係市場預期嘅下限價。
商住成新寵 財團爭爆
無可否認，商住項目近期都慢慢變成發展商嘅新寵，每逢推出都定必有理想反應，好似市區重建局土瓜灣北帝街商住項目，喺上個禮拜就吸引32家財團遞交意向書，仲平埋市建局項目嘅新高。
又好似今年初批出的葵涌興芳路商住項目，當時都收到19份標書，最後由不知名財團以每方呎樓面地價6,701元投到。
本周截標屯門地皮基本資料
地皮：屯門第16區海榮路與恒富街交界
佔地：約52,002方呎
總樓面：約354,572方呎
市場估值：約12.41億至14.18億元
每方呎樓面地價：約3,500至4,000元
App下載
