樓市出更:預租入伙盤大手兼鬥快

新聞資訊 > 地產新聞 返回
瀏覽人次 : 8848
地產新聞
樓市出更:預租入伙盤大手兼鬥快
(太陽) 2015年5月15日
香港人有幾鍾意住新樓,睇吓現時每逢有新盤入伙,租務成交幾咁暢旺就一清二楚。會德豐地產同新世界(00017)嘅西南九龍THE AUSTIN,啱啱開始交樓無耐,市場火速傳出預租個案,雖然涉及單位共有3間,但租客同業主都只係分別涉及1個咁多,原來係有公司客連環預租3個單位,全部係面積900幾方呎大單位,每戶月租大約4.5萬元,實用呎租約49至49.5元,租金屬市價水平。

地產界老友同劉Sir講,THE AUSTIN位處西南九龍市區地段,樓下就係西鐵柯士甸站,交通方便,要買嘢嘅話,行一陣就可以去到九龍站圓方或者尖沙咀海港城,想血拼都話咁易。

興勝尖沙咀盤加推

佢話呢個項目之前開售時話咁快就賣晒,市場上有唔少租客吼住呢個盤入伙就租返個單位住吓。

老友又話,THE AUSTIN啱啱錄到嗰3宗連環預租個案,3伙均由同一個投資者持有,據聞,呢個投資者喺九龍站一帶持有唔少物業,堪稱區內二手大業主,早前都大手買入呢個項目一批單位,今次租出3伙位處20樓以上高層,其中2A座高層A室,實用面積910方呎,月租約4.5萬元,呎租49.5元,比起購入價,計落租金回報率有近3厘。

至於呢個盤依家有約90個租盤喺市場放緊,月租叫價大約2.2萬至22萬元,其中一類面積僅300幾方呎開放式細單位,個別實用呎租叫價超過60元。

其他尖沙咀一帶嘅新盤都有新動向,興勝項目管理董事周嘉峰昨日話,尖沙咀The Austine Place累售22伙,套現超過4億元,最新加推4個連平台及天台特色戶喺星期一起發售,昨日就首度安排傳媒參觀平台特色單位。

名鑄推四單位標售

另一方面,新世界尖沙咀名鑄啱啱就推出3伙相連同1伙複式單位招標發售,單位分別係59樓C室、59樓D室、62樓B室、63及65樓G室,單位實用面積由1,724至2,969方呎。

名鑄招標日期由本月十八日開始,六月二十六日截標,招標文件今日起派發。

劉Sir