非核心區舖位受追捧，劉Sir知道億京即將開賣沙田石門安群街3號商場樓花項目，共拆細160個舖位，首批先推2樓約莫40個舖位，入場費約272萬元，下月十五日開賣，為馬鐵站沿線首個拆細舖出售項目。此外，該集團發展項目籌劃經理黎裕宗話，市值逾10億元嘅天水圍酒店項目，已獲5至6個買家洽購，料項目年內售出。
黎裕宗同劉Sir講，安群街3號項目有別於一般市面上嘅拆場，項目係一手全新物業，唔同出面嘅拆場要全部改過哂間隔，家商場3樓已經以約2.5億元售予彩福集團，寫字樓部分已售出九成單位，餘下不足1萬方呎樓面，項目今年秋天落成，項目總值約51億元。
天水圍項目意向十億
而安群街1號目前已沽出商場2樓半層樓面予富臨酒家，寫字樓部分則已售出約七成，料下年第二季就落成。
中原商舖部高級區域營業董事陳國坤話，安群街3號商場部分提供160個舖位，首批推40個，面積由107至9,146方呎，入場費272萬元，買家可獲回贈釐印費，最高達4.25%，尋日開始收票。
黎裕宗又話，旗下天水圍酒店及商業項目，酒店部分提供350間客房，每間價值約300萬元，已獲預售樓花同意書，意向價逾10億元，項目唔可以拆賣，但已有5至6個買家洽購，包括本地及內地資金，亦有美國酒店營運商；而商場部分提供約250個舖位，料最快於5月中拆售。
佢話，億京旗下觀塘「三寶」，包括創業街寫字樓項目最快下個月推出，提供40萬方呎樓面，料呎價約1.1萬元，總值逾40億元；而駿業街商場部分已售約9成，寫字樓沽出約三成；另成業街寫字樓部分亦沽出約三成。
近日交投暢旺，商業物業放盤增加，第一太平戴維斯李小姐話，灣仔軒尼詩道78至84A號地下入口、1樓至2樓舖位連部分外牆，面積約7,000方呎，以約1.68億元放售。
天后商廈全層億九放
另中原林經國話，天后威菲路道萬國寶通中心4樓全層以約1.98億元放售。利嘉閣連秋成話，尖沙咀加拿分道25號5樓至6樓，面積約1.1萬方呎，以80萬元放頂租，較現租金低約兩成，租期尚餘2年死約及3年生約。
劉Sir
App下載
