樓市出更:工廈半年炒高5成

新聞資訊 > 地產新聞 返回
瀏覽人次 : 7973
地產新聞
樓市出更:工廈半年炒高5成
(太陽) 2015年4月17日
個人遊政策收緊,舖位市場首當其衝受影響,但工廈物業買賣氣氛仍然熱鬧。劉Sir尋日撞到資深投資者林子峰,佢話啱啱以9.338億元摸出舊年十月先買入嘅葵涌威信物流中心全幢,持貨約莫半年就大賺約3億元,物業期間升值咗47%,非常誇張,相信今次亦係今年為止最大額嘅工廈買賣成交。

林子峰同劉Sir講,佢同另一位資深投資者陳秉志各持一半業權嘅葵涌威信物流中心全幢,最近以約9.338億元成功摸出,持貨約半年大賺約3億元。以該工廈總面積約282,130方呎計算,是次交易平均呎價逾3,300元。

林子峰又話,其實過去都好少買入工廈,但係上年見呢幢工廈呎價低於市價,所以就果斷入市,對於未來投資策略,佢就話無論工廈、舖位或者商廈,只要低水而且有升值潛力,就「咩都會睇」。

其實林氏早喺舊年已經同劉Sir講,威信物流中心全幢嘅購入價的確係「買得平」,隨即標售時已經有幾組客出價搶,不過就等緊一個「靚價」。

永得利一籃子9100萬沽

睇返資料,林氏喺去年十月以6.338億元向永旺(00984)購入上述工廈,當時呎價約2,247元,原先開價要7.7億元。今次摸出物業,約半年內升值咗47%,相信係今年至今最大額嘅工廈成交個案。

另外,葵涌工廈永得利廣場1座高層及2座高層多個單位,獲買家以近9,100萬元購入。據土地及公司註冊處資料,新買家公司董事為鄧鉅明,與太子珠寶鐘錶主席同名。今年首季僅錄得兩宗逾4億元的大額工廈成交,包括金朝陽(00878)以4.525億元買入同區捷德大廈。

元朗舖嗌平15%求客

舖位市場繼續無運行,美聯吳采霖話,元朗青山公路75號地舖交吉放租,面積約1,350方呎連1,650方呎閣樓,早前曾叫租40萬元,現時減至34萬元放租,足足平咗15%,依家個舖暫時由散貨場短租,而前租客係大型連鎖電器店。

另外,有市場消息話,銅鑼灣告士打道雙號地下G01至G02號舖,面積約1,400方呎,獲現租戶鐘錶店以49萬元續租,較舊租42萬元僅高咗16.7%。

劉Sir