近年樓價喺辣招打壓下依然升勢強勁，睇番差餉物業估價署截至二月底最新數字，私宅售價指數按月再升約2.3%至291.1點，屈指一算已經連升十一個月，又創歷史新高。再睇番一三年二月推出雙倍印花稅措施嗰陣有240點，原來樓價兩年升咗約莫21.3%，各區實用面積431方呎以下上車細單位，兩年間升咗約15.4至30%不等。最新實用呎價報約9,886至13,648元，齊創歷史新高，難怪市民係咁呻上車難啦。
劉Sir睇返差估署最新嘅數字，二月私宅售價指數報291.1點，再創下歷史新高。
以地區同埋實用面積劃分，港島、九龍同埋新界實用面積431方呎以下細單位全線報升，按月升幅約1.5至3.3%，呎價報約13,648、11,039及9,886元，齊創歷史新高。
原來唔經唔覺呢啲上車單位嘅實用呎價已經升到咁高，除咗九龍區升穿咗萬一元，新界區都逼近一萬元水平，難怪政府喺今年二月底要推加辣招遏抑樓市。
私樓租金升足一年
事實上，政府對上一次出招已經係一三年二月，劉Sir知道，私宅售價指數當時報240點，即係話樓價兩年升咗約21.3%，新界及九龍區細單位呎價升幅跑贏大市，累升約30%及26.1%，而期間港島細單位就升咗約15.4%。
至於租金方面，亦隨着樓價上升，該署資料顯示，二月份嘅私宅租金指數按月上升約莫0.5%，去到167.8點，升足十二個月。
港島舖租冧22%慘情
此外，近排零售市況轉弱，二月份港島區私人零售舖位呎租大約112元，按月大跌10.7%，比起一年前更勁跌22.5%，係唯一過去一年錄得跌幅嘅地區。
九龍同埋新界區舖位呎租就約134元及122元，分別按月跌咗3.1%及上升19.8%，按年比較就升約6.3%及16.5%。
劉Sir最近去開元朗，見到經營勝利牛丸超過三十年嘅老闆胡先生，佢話旗下康樂路分店早排已經不敵加租結業，租金由原來嘅9萬元加至15萬元，只好無奈結束，現時喺區內只餘下兩間分店。
劉Sir
App下載
