西區一向以單幢樓同舊樓為主，所以買家多數係街坊，一幢樓往往一年只得3、4宗成交，不過自從港鐵西港島線通車後，區內部分物業最近成交量，拍得住去年全年水平。劉Sir睇番啲登記，好似第三街觀海閣同堅尼地城嘅龍暉花園，今年以嚟錄到3宗買賣登記，比舊年全年只少1宗，而呢類街坊盤樓價升幅都唔錯，其中高街翠華閣有高層單位以近400萬元賣出，同類單位唔夠一年，個價升咗逾兩成。
觀海閣舊年錄得4宗買賣登記，售價介乎約280萬至310萬元，而今年暫時錄到3宗，每宗做價去到近300萬元至近350萬元。
觀海閣實呎萬八新高
好似觀海閣高層A室，實用面積約187方呎，以348萬元賣出，實用呎價18,610元，呎價除咗係呢個物業新高之外，相比起西區名廈寶翠園依家平均實用呎價近2萬元，都唔算失禮。
至於鄰近港鐵站嘅龍暉花園，今年到依家都錄到3宗買賣登記，同舊年全年比較，都只係差1宗，最近單位成交價更加逼近500萬元，好似有個1座中層C室，實用面積約307方呎，以496萬元賣出，實用呎價達16,156元，創咗屋苑新指標。
呢類知名度唔高嘅街坊盤，由於無咩外區客，所以過往樓價升幅未必追到大市，但依家就唔同咁講，部分單位比一年前升咗超過兩成。好似西營盤翠華閣，今年有個高層A室以399萬元賣出，相比一年前有個再高層啲嘅A室，成交價328萬元，升幅約22%，表現跑贏唔少大型屋苑，若果以單位實用面積約225方呎計，實用呎價去到17,733元。
寶翠園心雄索4千萬
而位於第三街嘅豐逸大廈，今年已經錄到兩宗買賣登記，係舊年全年水平，有個中層A室今年賣咗440萬元，相比唔夠一年前的同類單位成交價係362萬元，都升咗約22%。
反而同區豪宅寶翠園，呢兩個月交投唔係特別旺，事關港鐵通車之後，啲業主更加睇好呢個盤嘅升值潛力，除非個價好理想，否則未必會心動出貨，依家有部分單位實呎叫價超過2.7萬元。
好似該物業單邊嘅第1座，有個中層E室，實用面積1,447方呎，望開揚景，開價要4,000萬元，計落實用呎價約27,643元。
劉Sir
App下載
