政府推咗辣招稅之後，發展商舊樓收購活動明顯轉慢。舊年強制拍賣成交個案只得12宗左右，但交易金額仍然超過62億元，反映到併購項目規模較大。測量師老友同劉Sir講，今年申請強拍嘅地盤比往年少，預計以後每年強拍個案大約有10至12宗左右，主要喺發展商捨難取易，轉為加大力度入標投政府地皮。
劉Sir知道，舊年通過強制拍賣成交嘅個案，雖然成年只得12宗，但涉及嘅交易金額都唔細，有成62.1515億元。喺12宗成交個案中，強拍常客恒地（00012）佔咗一半，有6宗，計下條數，佔全年強拍交易金額約68%。
去歲西環大樓最矚目
如果睇返舊年嘅強拍個案，成交金額最大喺恒地西區西環大樓項目，舊年十一月喺無競爭對手下，以底價29.57億元投到。呢個項目恒地喺○九年已經開始密密收購，令到持有項目嘅業權份數去到約96.7%，不過到統一業權歷時長達五年之久，真喺唔容易。
劉Sir收到風，呢嗰項目總投資額約45億元，會重建成一幢38層高嘅商住物業，地盤面積約29,875方呎，預料提供600個住宅單位，以細單位為主，有機會喺一六年以樓花形式開賣，估計一八年底落成。
另外，值得一提就喺鰂魚涌吉祥大廈，新世界發展（00017）、周大幅以及相關私人財團，經過幾年時間，六次強拍，終於喺舊年六月份，最後一次強拍，以底價4.21億元成功統一餘下業權，據了解，六次強拍涉資共約12.25億元。
今年暫僅錄一宗強拍
第一太平戴維斯估值及專業顧問董事總經理陳超國話，近年政府主動賣地，令發展商投入資源投地。而政府推辣招稅後，小業主叫價較以往硬淨，增加收購難度，同時亦令收購舊樓嘅成本大增，而家發展商收購舊樓已無咩肉食，發展商同政府買地仲慳水慳力。
陳超國仲話，今年強拍個案維持10至12宗水平左右。事實上，劉Sir計下條數，今年到家，都只係得1宗強制拍賣成交，就係由恒地以底價2.4億元投到嘅九龍西洋菜北街456、456A、458及458A號舊樓。
劉Sir
App下載
