婚姻与置业挂鈎 面包比爱情价高

新闻资讯 > 地产新闻 返回
浏览人次 : 4923
地产新闻
婚姻与置业挂鈎 面包比爱情价高
(东方) 2018年7月13日
「有楼有女,冇楼冇女」已经系今日香港嘅写照,唔好怪港女现实,事关无论乜嘢年代,安居乐业先系最重要,连安乐窝都冇,仲讲乜嘢成家立室呢。可惜吖,房屋问题系老大难问题,香港上楼比上青天更难,难怪剩男剩女愈来愈多。

嗱,有交友配对公司访问咗六百多名港男港女,绝大部分男女都认为置业系必须,超过六成女士期望另一半最好或必须有物业,认同异性拥有私楼会加分。另外,超过七成男士认为有楼会较易识女仔,近半男士深信拥有愈大额物业,识女朋友嘅机会愈大。

调查结果一啲都唔令人意外,好似雀仔咁,雄鸟除咗以鲜艳羽毛博取雌鸟欢心,仲会送上鸟巢作为求偶礼物,连动物都识咁谂,万物之灵嘅人类又点会例外。试谂吓,一男一女组织家庭,连个遮风挡雨嘅窦口都冇,点掂呀,唔通真系有情饮水饱,瞓街咩。之前有港女喺电视节目爆出「有楼有高潮,冇楼唔好白撞」嘅惊人金句,虽然粗鄙,但如果唔因人废言,未尝唔系反映现实o架。所以话,你有压力,我有压力,港男压力真系唔嘢小。

系呀,香港地就系咁现实。尤其系今日楼价竞比天高,不论男女都好,只要有楼揸手就自动成为人生胜利组,唔愁冇得拣。就算退一万步讲,买唔起私楼、居屋都唔紧要,只要上到公屋亦一世无忧。唔系讲笑,有年轻家庭因为幸运地上到公屋,一年去几次旅行唔在讲,仲可以放胆生仔,家庭成员多咗,又可以换大单位,几爽呀,可惜公屋供不应求,幸运儿只占少数啫。

谂起都悲哀,房屋明明系生活基本需要,偏偏喺香港成为奢侈品同身份象徵,有楼代表成功,冇楼代表失败,大把人为层楼捱生捱死,一世为发展商同银行打工,正如电视剧经典对白话斋,「咁叫做公平咩?」讲到尾,咪就系港府无能罗,咪就系高官凉薄罗。咪睇林郑讲到自己几咁重视房屋问题,一言以蔽之就系嫌贫爱富,连新建公屋都要转为绿置居发售,有钱住新楼,冇钱住旧楼,话之公屋轮候大军等到颈长。至於最近推出嘅「三目标、六措施」,统统以置业为主导,对冇能力置业嘅年轻人不屑一顾,唔系嫌贫爱富系乜吖?

时间唔等人,香港人口老化不断加剧,同时剩男剩女达到廿几万之众,适婚人口无法成家,遑论生儿育女,再咁落去,香港仲边有活力同竞争力o架?唔该林郑咪净系识顾住业主利益,都要望吓买唔起楼嘅一群,再唔谂办法增加土地及房屋供应,社会矛盾只会愈演愈烈嘅咋。