人无远虑，必有近忧；官无远虑，市民更加有排愁。呢，好似近年几条新落成嘅公共屋邨咁吖，社区配套设施应有尽无，唔知嘅入到去仲以为系禁闭式难民营添呀。
立法会福利事务委员会寻日开会，有议员就闹爆政府规划水皮，话好多新公屋入伙经年，但区内交通、教育、福利配套通通追唔上需求，居民搭车难、返学难、生活难，仲惨过做开荒牛。劳工及福利局局长罗致光奉旨又系大耍官腔，答咗等於冇答，佢话喎，会研究点样改善部门间嘅协调，又话其实政府有「社区投资共享基金」，帮啲新入伙家庭尽快融入社区。
呢啲咪九唔搭八罗！家阵唔系居民自己想摺埋，而系想「融入」社区都「走投无路」。好似曾经被林郑形容为「贫穷邨」嘅沙田水泉澳邨咁吖，起喺山腰位置已经够晒吊脚，全邨仲要得一条路出入，每逢返工返学时间，巴士埋站上客，后面车龙就塞死晒；同样起喺山上面嘅秀茂坪安达邨，交通差唔在讲，仲要即使已经有九成住户入晒伙，区内学校仍然系块工地，学生最快要到今年底小学落成后，先有望摆脱内地山区学童一样嘅坎坷生活，「全港最垃圾屋邨」果然名不虚传。
真系谂极都唔明，以前英国佬留低嘅公屋制度，本来搞得好哋哋，连新加坡国父李光耀都要嚟香港取经，照计官老爷萧规曹随，跟住嗰套规划机制就实冇衰，偏偏港官连照抄都懒，起咗公屋就关人个关，到有批评声音就掟个「社区投资共享基金」出嚟做挡箭牌，一副「有屋你住咪咁多嗲」嘅凉薄嘴脸，类似天水围「悲情城市」嘅哀歌不绝如缕，家阵知点解喇。
唔怕唔识货，最怕货比货。以前港英年代大兴土木起公屋喺沙田、屯门等地发展衞星城市，规划由零开始；家阵港府起公屋，唔理系市区牙签楼抑或好似水泉澳邨位处山旮旯嘅屋邨，配套规划一样系天残地缺，愈来愈多人怀念事头婆时代，唔该班废官戙高床板自己检讨吓喇！
有人就讲得啱喇，公屋系用嚟住人，唔系求其塞晒啲人入去就当交咗差。嗱，咪畀人批中，公屋落成进度严重滞后，轮候队伍愈来愈长，政府为咗做靓盘数，莫讲话配套未足，几乎连水泥未干都想塞人入去住，可怜班居民出外打工搵食困难，就连有乜头晕身㷫想搵个医生睇吓分分钟都要跨区至得，仲话国际大都市喎，简直笑大人个口！
一句到尾，港府做嘢冇精神、冇灵魂，唔系将应该住人嘅公屋丢空养老鼠，就系推啲基层去做开荒牛，港官大事唔识做，小事做唔好，香港人想安居乐业都几难。
App下载
