高球场吸投资者 郑伦光：填海解住屋问题

公营房屋追唔上需求，基层市民唔知几时先上到楼，社会各界都有好多唔同嘅建议去解决住屋问题，其中一个最具争议嘅地点就系占地一百七十公顷嘅粉岭高尔夫球场，好多人话高球场占地多，服务嘅人少，应该收番嚟起楼。

不过，欧洲亚洲华人高尔夫球协会名誉会长郑伦光就话香港作为国际城市，高球场系可以吸引外来投资者嚟香港投资嘅工具，加上香港嘅高球场少到一只手数得晒，如果再cut多个，咁会令香港打高球嘅人愈嚟愈少。

称有大片草地 助改善环境

咁住屋问题点解决先？佢就话填海应该系最理想嘅做法，虽然有人话填海对环保有影响，但佢认为保留高球场系有助改善环境，始终高球场拥有一大片草地，亦都会种植唔少树木，而旧时可能都仲有人投诉用好多杀虫水，但今时今日随住科技进步，杀虫嘅技术已经改善咗好多，所以保留高球场对环境其实系利多於弊，系值得保留嘅。