钢琴王子弹出两层楼！

香港楼价贵到离谱，年轻人上车系咪一定要靠父干呢？「钢琴王子」陈隽骞（Phoebus）当年上车，点样可以收租够供楼有凸，够埋佢另外再租楼住？Phoebus寻日就喺一个发展商搞嘅场合上面，分享上车嘅心路历程。

Phoebus话，啱啱毕业时遇上○三年沙士，市道唔好，佢惟有Freelance教钢琴储首期，到28岁（丝丝计番，大概○八年左右）以20万首期首次置业，买入西营盘第三街旧楼单位，当时月供8,000元。单位原本谂住自住，但撞啱附近香港大学嘅老师肯以两万元租佢单位！就系咁，租金已够佢供楼兼自己另外再租楼。

「唔敢现价入市」

后来Phoebus以900多万元购入西半山The Babington单位。两、三年后，已为人父嘅佢卖出单位，再搬到过千尺嘅何文田窝打老道4房单位；而佢亦仲有一层供紧嘅皇后大道西旧楼，目前收租约1万元。

佢投资经验咁丰富，依家都话唔太敢入市，因为楼价太高，佢认为政府如果唔改变现行房屋政策，楼市状况唔会有大改变，睇历史就知道楼价永远唔会跌，加上香港地少人多，下一代想置业的确好难。

话时话，「钢琴王子」点炼成？Phoebus出身音乐世家，阿爸陈钧润喺歌剧界无人不识，曾任中英剧团董事局主席。Phoebus本身中大音乐系毕业，但○○年佢读紧大一时，已自荐到商场弹钢琴，之后仲喺尖沙咀海港城演奏咗八年，被称为「钢琴王子」。

余丝韵