记得有位前高官讲过，细个时一家五口逼喺百零尺嘅板间房，仲要同另外四伙人合用厨房厕所，后来好好学习，天天向上，终於出人头地。可惜吖，呢啲励志故事只系少数，大部分香港人仲住紧豆腐膶咁细嘅蜗居，真系讲起都一壳眼泪。
有团体访问全球廿二个国家同地区嘅网民，结果发现香港受访者喺改善居所整体面积及设计、储物空间，以及如何更妥善组织家居设施等三项期望，分别占五成、四成七以及四成，比例系全球最高。讲真，呢个结果一啲都唔出奇，有人计过数，同十年前比港人平均居住面积缩水一半，仲远远跑输北京、台北、新加坡以及东京等大城市添。
周星驰笑片有句经典对白∶「呢个表面系一个风筒，实际上系一个须刨」。其实香港人啲家俬都系一样，表面系一张梳化，实际上系一张床，同时亦系一个柜桶。冇计喇，地方浅窄，惟有偷尽每寸空间，装入墙衣柜、加高地台，「僭建」阁仔等固然唔少得，有人甚至喺厅装多几块镜，等地方睇起嚟阔落啲，其实讲到尾咪又系自欺欺人。
至於储物空间，亦令唔少人伤透脑筋。男士们嘅模型、漫画，女士们嘅靓衫靓鞋毛公仔，地方有涯而杂物无涯，掉晒又唔舍得，咁就难怪工厂大厦迷你仓近年开到成行成市，问题系呢类迷你仓消防隐患多多，一个唔好彩，分分钟重演牛头角长命火。仲有吖，一个人长期屈埋喺狭小空间，脾气都零舍暴躁，好多家庭纠纷、伦常惨剧就系咁样嚟嘅嘞。所以话，房屋问题牵一发动全身，绝对唔讲得笑。
当然喇，屋企地方再逼仄，话晒有个属於自己嘅安乐窝，比起劏房户算好幸福咯。今日劏房五花八门，猪栏、鸡棚、货柜改建有之，上床下厕有之，连外国电视台都报道过，搞到香港臭名远扬。点解劏房有价有市？仲使问，基层租唔起私楼，排队上楼又等到天光，咪焗住硬食罗。
可能有人会话，香港地少人多，寸金尺土，房屋问题系死症，嗱，呢铺讲法要戒嘞，新加坡仲细过香港，但人均居住面积足足大一百平方尺有多，而且超过八成人住喺类似香港公屋嘅「组屋」。不过香港人唔恨得咁多喇，好简单，净系讲填海增加土地供应，新加坡做得到，香港阻力重重，加上政府弱过药材铺，发梦冇咁早。
难为发展局局长「劏房波」仲好意思话自己能够完成五年任期，系唔少人心目中嘅奇迹，计功夫茶话斋，市民忍你班废官咁耐就真系奇迹嘞。所以话，港人想改善居住环境，首先要踢走无能废官！
App下载
