古人话「苛政猛於虎」，道出暴政欺压人民嘅可怕。但时移世易，呢句说话未免有啲过时，今时今日，有乜嘢比老虎更凶猛呢？仲使讲，之唔系地产霸权罗。
有办你睇，近年老牌食肆难敌天价租金，执吓一间，执吓又一间，已经买少见少。话口未完，继有电影《花样年华》及《2046》取景地金雀餐厅停业后，开业至今逾四十年嘅湾仔乐意扒房亦都难逃厄运，因为捱唔住贵租而将於本月底结业，扒房老板寻日举行「告别派对」，广邀城中名人回味扒房美食，令人不胜唏嘘无奈。
其生也荣，其死也哀。乐意扒房系唔少人嘅集体回忆，前尘往事一箩箩，九七前唔止官商名流冠盖云集，仲有唔少英军及外国人慕名而至，熟客日日打趸，夜夜笙歌，基本上系唔忧做嘅。
可惜，好景不常，回归后香港好似撞邪咁，一百八十度大逆转由盛转衰，打工仔实际收入不升反跌，搵朝唔得晚，边有闲情逸致去锯扒吖。更大剂嘅系，香港一直赖以为荣嘅国际都会金漆招牌日渐褪色，洋人较脚不在话下，弊在内地客来港亦备受歧视，一时驱蝗，一时鸠呜，仲唔吓到走夹唔抖咩。好嘞，即使肯贴钱买难受嚟旅游，毕竟华洋口味有别，而且习惯多揸筷子，少动刀叉，扒房生意自然冇运行啦。
正如扒房老板话斋，以前环境几差都好，咬紧牙关一样可以走出谷底，好似前年占中影响市道，甚至沙士袭港咁大剂，咪又系一个打十个捱得过，势估唔到过得初一，过唔到十五，过得沙士，过唔到贵租。所以话，风水佬就话呃你十年八年，李超人所讲「目前香港经济为二十年来最差」，当堂应验晒，咪话唔湿滞。
话时话，地产霸权猛於虎，何止吞噬高档次西式餐饮业，即使良心小店亦唔能够幸免。嗱，好似经常免费派饭予基层及露宿者嘅「深水埗明哥」嗰间「北河点心餐厅」咁吖，业主突然大幅加租，由月租四万元加到五万元。系人都知，小商户本小利微，根本冇招架之力，咁样逆市狮子开大口加租，即系叫人执笠嘅啫。
幸好人善人欺天不欺，喺明哥头痕之际，忽然有附近业主拔刀相助雪中送炭，以优惠价钱租个铺畀佢，慈善饭堂先得以继续惠及区内基层o架咋，咁嘅好人好事，喺现今见钱开眼嘅势利社会，真系好温馨、好难得。
讲到底，目前饮食业所遇嘅困境，正正系香港嘅缩影，与其坐困愁城，不如寄情老歌，惟有唱句「愿明天香港也是天堂，定能看得见一点曙光。」
App下载
