晋惠帝「何不食肉糜」嘅故事成为千古笑谈，呢位昏庸皇帝因此成为不知民间疾苦嘅典型例子，估唔到今时今日居然仲有类似笑话，唔到你唔服。
话说房屋协会搞咗个富贵长者屋计划，提供五百八十八个单位畀六十岁以上长者租住，结果反应冷淡，至今仅租出四十五个单位，出租率连一成都唔够，可以讲惨不忍睹。无可奈何之下，房协惟有调低一成租金，同时推出为期两年嘅「短租」，希望可以吸引更多长者喎。可惜吖，寻日系减租后第一个拣楼日，一样门庭冷落，参观者寥寥无几，多数长者嫌贵唔肯落叠。
点解会搞成咁？咪就系因为不切实际罗。呢个位於北角丹拿山嘅富贵长者屋「隽悦」，话就话设施齐全，除咗有中西医诊所，仲有各种家居护理及支援服务，听落好似好吸引咁，可惜费用一啲都唔平，租住权费由百几万至接近一千万元不等，其中四百几万元嘅单位最多，除咗租金，每月仲要支付每尺四元一角嘅管理费，同埋每人八百元嘅服务费，几乎可以媲美豪宅，你话有几多长者负担得起吖？
正如有人话斋，如果有几百万元，不如选择住老人院好过，每年都只系十几万元啫；如果唔想住老人院，亦可以喺屋企请工人服侍，点计都平过租住富贵长者屋喇。
冇错嘞，有经济能力嘅长者根本唔需要房协照顾，反而好多基层长者老无所依，当局就阔佬懒理，简直系本末倒置。难为房协仲唔承认失败，声称外国呢类计划好流行，香港首次出现，好多人唔理解，需要时间消化喎。
嗱，呢啲咪就系死撑罗。所谓一处乡村一处例，外国富贵长者屋好流行，唔表示香港亦可以流行，正如外国老人家有退休保障，而香港老人家只能望天打卦一样，房协官僚离地，一味东施效颦，唔撞板至出奇。有长者直斥房协「嘥政府钱，好似败家仔」，真系冇讲错（ｏ架），家阵房屋问题咁严重，无壳蜗牛望楼兴叹，房协唔系谂办法增加房屋供应，反而将珍贵嘅土地资源用嚟兴建富贵长者屋，搞到唔汤唔水，唔系败家又系乜。
不可不知，房协系公营机构，好多土地由政府以优惠价钱批出，与其阿茂整饼冇嗰样整嗰样，点解唔将资源放喺最需要嘅地方呢？好似房协另一个长者安居乐住屋计划咁吖，只需支付几十万元就可以申请入住，结果大受欢迎，申请者大排长龙，点解房协唔起多啲呢类长者屋呢？
讲到底，富贵长者屋反应冷淡，除咗反映房协唔了解长者嘅真正需要，亦反映港府嫌贫爱富，对基层长者嘅苦况视而不见。
App下载
