下年度卖地计划将会喺今个拜礼政府发表财政预算案后公布，依家卖地表得番15幅住宅地，市区地更只有3幅，但刘Sir觉得有机会纳入下年度卖地表嘅新增供应，市区地会系焦点。预计鸭脷洲利南道香港驾驶学校，同埋坚尼地城两幅西宁街政府地会加入卖地表，呢3幅地已经合共提供近2,000伙，初步估值逾116亿元。
近年政府持续提出改变土地用途去增加供应，呢啲地皮部分有望纳入下年度卖地表，刘Sir觉得会有多幅市区地喺下年度释放，焦点系鸭脷洲利南道香港驾驶学校用地，地盘面积约12.7万方尺，总楼面约76.21万方尺，预计可以提供约1,416个单位。
老友高力国际张翘楚话，呢幅地系少有嘅临海市区供应，估计每方尺楼面地价大约1万元，估值约莫76.21亿元，佢话如果唔系项目规模咁大，地价可能仲高。
至於坚尼地城亦有3幅土地将划作私宅用途，其中两幅规模较细嘅西宁街地皮有机会率先纳入新卖地表，占地超过2.4万方尺嘅西宁街巴士总站用地，提供逾24万方尺楼面，可建大约460伙。
港铁黄竹坑站料「斩件」
另外，西宁街亨富阁毗邻用地，可建楼面就超过4.3万方尺，提供约莫80伙。呢两幅地皮相信可以为库房带来超过40亿元嘅进帐。
刘Sir推测，下年度铁路项目供应来源有机会由将军澳转移到黄竹坑，呢个港铁黄竹坑站上盖住宅物业发展项目，占地广逾77万方尺，住宅同埋商业楼面分别约384.82万方尺及50.59万方尺，刘Sir相信咁大件嘅项目会「斩件」推出，未必会喺下年度「晒冷」，而成个项目估值就约391.87亿元。
市况差 常盛街估值缩
此外，何文田常盛街住宅地会喺今个星期五截标，由於市况较早前回落咗，理想城市调减约9%估值去到约58.6亿元，每方尺楼面地价大约1万元。
另政府卖地近年成日受到司法覆核挑战，发展局局长陈茂波就话，如果因司法覆核而叫停卖地，会影响卖地机制同开不良先例，仲有机会畀个别人士用嚟做工具，阻碍政府及时为社会提供急需的土地供应，令整个土地供应崩溃。佢又重申政府不会贱卖土地，卖地前会审慎行事，仲会就有司法覆核嘅土地谘询法律意见。
刘Sir
App下载
