楼市出更:元朗凹头地估值两极

新闻资讯 > 地产新闻 返回
浏览人次 : 3762
地产新闻
楼市出更:元朗凹头地估值两极
(太阳) 2016年1月18日
供应重灾区元朗再有地皮喺今个礼拜五截标,呢幅政府加插喺上季卖地计划嘅元朗凹头住宅地,系今年首幅截标嘅政府住宅用地,地皮位置毗邻由新地(00016)发展嘅新盘尔峦,新地亦已率先表态会研究入标。不过市场对呢幅地皮嘅估值分歧颇大,有测量师觉得地盘发展上有相当限制,估值最低由约9.9亿元起,去到最高约18.4亿元。

刘Sir知道,呢幅元朗凹头住宅地占地约莫30.63万方尺,提供大约36.76万方尺住宅楼面,其实地皮原先并唔属於上季卖地计划推出嘅用地,因为原先计划推出嘅大埔荔枝山山塘路、同埋两幅大埔露辉路住宅地,但受到司法覆核问题影响而未能如期供应,所以政府特意加插咗元朗凹头同埋另一幅深水埗地皮去填补番供应。

而即将截标嘅元朗凹头住宅地,位於新盘尔峦毗邻,所以刘Sir都相信新地几大机会出手竞投。新地副董事总经理雷霆都话,集团会研究入标。

涉架空路段碍布局

老友高力国际张翘楚就咁睇,佢话呢区民生配套都开始多咗,虽然块地唔喺正市中心,但都会吸引到财团出价,其中新地喺元朗持有唔少项目,包括毗邻地皮嘅尔峦,所以对该集团嚟讲都几有策略性。

但呢幅元朗凹头地皮位置上对发展有一定局限性,部分测量师就睇得较保守。

理想城市张圣典话,地皮有几个部分划咗为不可构设建筑物地段,好似西铁架空铁路路段下方等等,咁会对项目嘅发展布局上产生唔少限制,认为做价或者会偏向保守,佢估计每方尺楼面地价约莫2,700元。计番估值就大约9.9亿元,系目前市场嘅下限价。

料建中低密度住宅

至於中原测量师行张竞达就对地皮睇得好啲,佢就话,地皮驳车往来西铁站都算几方便,而且又可以作中低密度形式发展,有机会提供少量洋房,估计每方尺楼面地价大约5,000元。即系估值约18.4亿元,系市场嘅最高估值。

刘Sir