近排二手买卖死晒火，特别系早两年交投活跃嘅新界上车盘，一来一回下旧年买卖真系跌得几痛。刘Sir睇见代理报告发现，旧年全年新界区二手买卖登记有16,231宗，比起前年劲跌21.9%最惨烈，但再仔细啲分，原来分区嚟计交投萎缩得最甘嘅分区唔系新界地区，而系黄大仙/钻石山地区，旧年交投按年足足跌咗43.3%咁多，同时拖累呢区总成交金额跌34%，跌幅亦冠绝各区。
老友中原黄良升同刘Sir讲，旧年港岛、九龙同埋新界三个主要地区嘅二手买卖登记按年全线下挫，因为下半年受到环球股市波动打击，楼市焦点又去晒新盘，拖累全年二手登记数字下跌。
用家上车步伐放慢
佢话三个主要地区以新界区跌得最劲，旧年全年录16,231宗二手登记，相比前年嘅20,780宗大减约21.9%，反映用家买楼上车嘅步伐减慢咗，九龙同埋港岛区亦分别按年跌咗约莫11.4%同埋6%，录12,248宗及7,861宗。
刘Sir发现，拆开24个分区，有19个嘅二手登记按年报跌，最意料唔到系跌幅最大分区唔属新界，旧年以黄大仙/钻石山嘅二手登记按年跌43.3%最多，亦拖累呢区总成交金额按年跌34%最伤，而买卖跌幅排第二都仲未到新界地区，香港仔/鸭脷洲二手登记按年减约29.6%，其后屯门录约29.3%跌幅。
屯门地皮嗌9500万
不过旧年新界7个分区二手交投就真系全线插水，除咗屯门跌最多外，荃湾二手登记都少咗约27.1%，好似北区、沙田、大埔同埋元朗/天水围呢啲上车主要分区，都有超过一成跌幅。
另一方面，忠诚拍卖老友代理同刘Sir讲，屯门青霞里6号一幅黐住官地嘅地皮会推出拍卖，呢幅地皮占地约5,000方尺，开价9,500万元，依家由一间老人院以3.78万元承租。
依幅地皮位於青山湾花园后方位置，仲黐住政府今年第一季卖地计划内嘅屯门市地段第516号地皮，估计部分发展商有兴趣一并取得以上两幅地。
刘Sir
App下载
