好多人以为港府管治班子拉杂成军，质素低下，咁谂就大错特错喇，查实港产官僚卧虎藏龙，能人辈出，好似发展局局长陈茂波咁吖，独具慧眼，一早识得重锤出击投资劏房，投资触觉直头拍得住股神巴菲特呀！
唔系吹水（口架）！有大学联同关注团体进行调查，根据差饷物业估价署四十平方米以下细单位嘅租金指数，再比较百多个同类型单位嘅劏房租金，以实际租金、电费等进行评估，制订全港首套劏房租金指数，结果发现过去四年劏房租金上升速度达五成六，而同类细单位升幅只有两成一，葵涌区一个一百尺劏房单位，月租竟然高达九千元，尺价仲超劲过豪宅，「波叔」咁有先见之明，抵佢发达嘅！
当然喇，有钱投资劏房就话猪笼入水啫，可怜住喺里面嘅基层市民，以豪宅级尺租住豆腐膶单位已经够无奈，环境同设备仲要差到无人有，嗰种辛酸实在不足为外人道。大家有眼见，今日香港劏房遍地开花，无奇不有，猪栏、鸡栏改建有之，一个单位劏成四份，一个窗口安装四部冷气机有之。至於笼屋更加系等而下之，有啲居然够胆死喺厕所上面间床位，人哋「前铺后居」，佢就「上居下厕」，问你服未。
不过你咪理，劏房笼屋再逼仄，环境再恶劣，咪一样有价有市。又难怪嘅，租得起私楼，轮得到公屋，边个会自己攞苦嚟辛住劏房笼屋吖？公屋轮候时间愈来愈长，所谓三年上楼嘅承诺，早就证明系空头支票，其中劏房户更加系重灾区，前排有调查发现，七成受访工厦劏房户同时轮候公屋，当中超过三成已轮候三年以上，一成人甚至超过五年添。
咁都未算吖，港府之前公布十年建屋大计，声称要兴建二十九万公营房屋，系威系势咁，点知转头就静静鸡调低指标，劏房户要轮候公屋喎，冇八年抗战嘅决心都唔掂吖。
话时话，劏房同笼屋问题已经讲咗N年，连外国传媒都报道过，搞到香港臭名远扬，点解情况不但冇改善，仲不断恶化？鬼咩，官僚阔佬懒理，漫不经心，蚊都瞓蛇都死喇。有人建议港府利用闲置校舍、政府宿舍等，为有需要人士提供过渡性房屋，问题系港府一边呻无地起楼，一边由得官地养蚊，申诉专员都唔知炳过几多次，即使有再多土地，无壳蜗牛都系得个睇字嘅咋。
都系北大人讲得啱，房屋问题处理不当，分分钟由民生问题演化为政治问题。今日香港已经七国咁乱，港府施政已经够晒甩辘，如果再搞到千千万万劏房户揭竿而起，你话到时点收科！
App下载
