市建局近排密密手推出项目，明日截标就有深水埗海坛街205至211A号需求主导项目，呢个系迷你版市区重建盘，市场估值约莫1.72亿至2.21亿元，折合每方尺楼面地价约4,500至5,760元。呢个项目贴邻系长实地产（01113）早前投到、规模较大嘅项目，所以会有协同优势，但对於其他发展商嚟讲，由於近排新盘销情减慢，股市又唔系太稳定，所以会影响佢哋嘅入标意欲，有测量师就估计接获标书有机会少过10份。
海坛街205至211A号项目，地盘面积约4,553方尺，预计总楼面约38,386方尺，当中住宅楼面约34,123方尺，商业楼面就有4,263方尺，估计只能够提供约69伙，属於市区迷你项目。
市建局早排邀请全数合共22家有份递交意向书嘅发展商入标，除咗大发展商长实地产、新世界（00017）、新地（00016）同南丰等，仲有万科置业（香港）呢类中资公司等。
刘Sir睇番近呢几年，原来市建局喺同区已经批出多个发展项目，好似明日截标嘅迷你项目，贴邻就系旧年年尾由长实地产投得，规模比较大嘅海坛街、桂林街及北河街项目。
长实或争 有协同效应
市场相信，若果由长实地产再下一城，相信可以带来协同效应，但对於其他发展商嚟睇，个项目地盘细，发展难度相对较高。
前排已经有发展商讲到明，细地盘开则会好辛苦，加上利润唔多，所以入标机会唔大。
单幢楼难与毗邻「包装」
产业测量师张翘楚就认为，今次个项目规模唔大，只属单幢楼，好难同毗邻发展项目可「包装」成大型新盘竞争，所以其他发展商入标顾虑增多。加上近期金融市场出现好多不利因素，而且最近新盘销情都好似慢咗，中小型发展商相信承担风险能力比较低，所以估计今次截获标书有机会少过10份。
综合市场睇法，呢个项目估值介乎1.72亿至2.21亿元，折合每方尺楼面地价约4,500至5,760元。据闻，市建局今次分红门槛系5.6亿元，即系收益过咗呢个数，首2,000万元要分两成畀市建局，之前每2,000万元就分递增，上限去到最高50%。
刘Sir
App下载
