面对不断恶化嘅房屋问题，港府好似打咗懵仔针咁，一味重重复复问「地从何来」，见缝插针、寸土必争未够，仲话要填海造地甚至放风要打郊野公园嘅主意添。学似学者话斋，港府与其舍近求远，舍易取难，不如充分利用市区闲置土地实际啲，真系冇讲错o架。
系人都知，香港并非无地可用，只系未有妥善规划嘅咋。有智库日前建议港府将部分环境价值低嘅郊野公园改划房屋用途。最好笑嘅系，高官呢头话建议可以研究，希望市民喺鱼与熊掌之间作取舍喎，嗰头又话呢届政府无此计划，咁搞法盏自打嘴巴嘅咋。
既然填海同发展郊野公园都成禁忌，甚至谂一谂都被批评系患咗大脑癌细胞，咁房屋问题真系无解？有学者系咁讲嘅，与其喺附近乜都冇嘅郊野公园划地建屋，倒不如发展现时城镇周边土地好过啦。佢仲引用政府资料，指依家仲有数百公顷官地可作低密度乡村发展，而现时新界平原亦有大量土地并非由村民拥有，呢啲闲置土地唔单止同原居民冇任何冲突，最重要嘅系接近城镇，有齐基础设施，只要适当规划就可兴建房屋，解决住屋问题话都冇咁易啦。
系呀，市区仲有大片闲置土地，如果都用来发展，的确可以解决好多房屋问题。再讲喇，目前被私人会所霸占但使用率奇低嘅官地都有几百公顷，净系一个粉岭高尔夫球场咋，闲闲地都可以建造万几个单位；仲有嗰啲年久失修嘅政府旧宿舍，重建又可以安置唔少人口o架。一句讲晒，唔系香港无地，而系官僚无能夹无脑，致使大量土地未能善用。真系有一日，市区闲置土地用晒，港府再讲填海也好，发展部分郊野公园也好，阻力都冇咁大，系咪？
可惜吖，港府就系咁奇怪，大把闲置地皮唔用，宁愿养蚊，结果咪拓土建屋沦为大只讲罗。港府承认，建屋远低於目标进度，未来五年只能提供不足十万个公营单位，比十年房屋大计嘅二十九万个目标差好远，咁就难怪三年上楼承诺成空，家阵平均拖到三点六年，查实拖五、七年都上唔到楼嘅唔系少数。
话时话，房屋问题尾大不掉，民怨已到爆煲边缘。区议会选举，激进派崛起就系警号，港府再唔解决问题，下次被占领嘅就唔系马路，而可能系政府总部咯，叮！
App下载
