政府上季卖地计划最后一幅地皮将会喺今个礼拜五截标，呢幅青衣细山路住宅地，系政府历年卖地以来首幅推出嘅青衣私人住宅地皮。测量师老友就觉得地皮最大风险系毗邻广达6.1公顷嘅斜坡，会增加发展商嘅不确定成本，市场估值最高约莫28.45亿元。
刘Sir知道，呢幅青衣细山路住宅地，位於青衣美景花园旁边，占地大约6.67万方尺，以最大商业楼面20.02万方尺计算，连同住宅部分，成个项目总楼面就约莫47.42万方尺。
周五截标 主打中小户
呢幅礼拜五截标嘅地皮，由於项目涉及庞大斜坡，所以最快要大约二○二三年十二月底前才能落成，建筑期长达八年，预计提供约740个住宅单位。
老友理想城市张圣典就咁睇，佢话发展商要负责项目附近斜坡嘅维修同埋保养工作，并要为后方大约6.1公顷嘅山坡进行岩土勘察等工作，咁样会增加咗项目嘅不确定成本，所以佢估计每方尺楼面地价约莫4,000元，计番估值大约18.97亿元左右，系市场下限价。
中原测量师行张竞达就睇得比较好，佢相信呢幅地皮会主打发展中小型单位，商铺部分就估计以民生行业为主，而地皮规模适中，预计入标反应会唔错，估计每方尺楼面地价大约6,000元，折合估值约28.45亿元，系市场嘅最高估值。
刘Sir知道，呢幅细山路地皮系政府历来首幅推出嘅青衣私宅土地供应，而近年批出嘅两幅同区地皮都系物流用地，对上一幅系一三年五月以逾16.9亿元批出嘅青鸿路与青衣路交界物流地，计番每方尺楼面地价大约1,850元。
二手市呆 美景未开斋
至於青衣市况方面，最近二手表现呆滞，就好似位於即将截标地皮毗邻嘅美景花园，今个月截至二十二日，交投都仲未破冰。
美联樊志聪同刘Sir讲，美景花园位置上比较唔方便，前往港铁青衣站需要约十分钟车程，向来交投都比较稀疏，屋苑今个月都仲未录得成交，依家有约20几个买卖放盘，入场费大约370万元。
刘Sir
App下载
