第三季楼市受到股市同息口问题困扰，买卖气氛麻麻，连一向唔忧卖嘅山顶、南区豪宅都无咁旺。睇番呢两区上季表现，虽然全季成交量只跌咗约5%，有约53宗，但由於亿元成交只得约5宗，按季急跌咗72%，搞到第三季成交总值得番约41.79亿元，比第二季嘅50.6亿元跌约17%。
美联方富义同刘Sir讲，第三季由於华懋等推售拆售大潭红山半岛洋房，单系呢个盘就占咗约28宗成交，令到上季山顶、南区交投量都冇咁失色，有约53宗，比起第二季只系少咗3宗或约5%。
全季亿元买卖仅五宗
不过，由於第二季各发展商积极推洋房新盘，期内卖出11幢一手洋房，包括50 Stanley Village Road占8宗、南崎1宗、环角径2号2宗，间间售价超过1亿元，而第三季喺洋房新盘推售唔多嘅情况下，全季只得5宗逾亿元二手成交撑住，所以比起第二季嘅18宗，就跌咗约72%。
租赁近百宗 实尺56元
讲番上一季最瞩目成交就系山顶白加道一幢洋房以约15亿元卖出，平均尺价约15.2万元，另外，深水湾道39号有幢双号屋以3.52亿元卖出，实用尺价约9万元亦系创咗项目新高。
至於指标二手屋苑，第三季成交量大部分系个位数，比较好嘅大潭阳明山庄都只系得6宗，浪琴园更加得1宗。
租务方面，呢两区第三季约有93宗租赁成交，平均实用尺租56元，当中洋房有18宗。而全季月租逾10万元的大额租务占37宗，尺租同月租最高系南湾道16A号一幢单号屋，月租35万元，以实用面积3,657方尺计，实用尺租高约96元。
何文田九龙塘近冰封
其实，上个月好多豪宅区都出现交投冰封情况，好似何文田及九龙塘传统豪宅区约莫有30多宗二手成交，唔单止比八月跌咗约37%，相比今年最旺嘅六月约莫有87宗，更大跌64%。
早几日九龙延坪道地皮以每方尺楼面地价约1.11万元成交，平过屯门地，不过代理老友就话，区内业主好冷静，无咩即时主动割价，事关唔少之前已经减咗价，但都仲未有成交，所以宁愿等有实在买家出价，先睇吓要减几多。
市场呢几日成交零星，部分做价差过七年前。利嘉阁李德臻称，东半山年达园一个实用面积约973方尺单位，获买家以约2,020万元买入，实用尺价约2.1万元。
刘Sir
App下载
