以前提起凶宅，人人避之则吉，不过今时唔同往日，一屋难求之下，无壳蜗牛唔理好丑，但求就手，连凶宅都变成抢手货，讲起都无奈。
嗱，新一期特快公屋编配计划又争崩头，总共有一千二百个单位，首批只有七百多个单位，当中六个曾经发生凶杀案，包括屯门安定邨○二年发生男保母连环杀两童案嘅单位。其他单位亦有唔少问题，唔系前住户自杀或者意外身亡，就系邻近垃圾房、受白蚁困扰或者被消防喉穿堂入室，总之多数系卖剩蔗。但结果一样抢手，总共接获八万八千三百份申请书，超额七十三倍，创近年新高，都咪话唔夸张。
有头发冇人想做瘌痢，咁多市民申请特快公屋，连凶宅都唔介意，都系无可奈何嘅咋。中国人一向对凶宅好避忌，认为大吉利是，家阵争崩头，反映房屋问题日益恶化，无壳蜗牛为求有瓦遮头，已经到咗饥不择食嘅地步。
唔系吓你，今日香港楼价与租金齐飞，劏房与笼屋一色，公屋已经变成无壳蜗牛嘅最大避风港。弊就弊在公屋严重供不应求，轮候册人数早已冲破二十八万大关，相信唔使几耐就会突破三十万大关，基层市民上楼难过中六合彩，咪惟有退而求其次，凶宅都顶硬上罗。正如有邻近住户慨叹：「冇得住都要住，边惊得咁多。」咁又系吖，家阵最怕嘅系无屋住，只要有得上楼，莫讲凶宅，龙潭虎穴都大把人争吖！
讲起真系可悲，香港号称国际都会，点知居住环境连第三世界都不如，好多市民上无片瓦遮头，下无立锥之地。早前有调查发现，劏房、板间房及天台屋等租金持续上升，今年一至七月比去年同期平均增加百分之八点三，而住户平均入息仅增长百分之一点八，基层市民收入远远追唔上租金升幅，导致愈住愈穷，愈住愈差。正所谓，愈穷愈见鬼，基层市民想唔住凶宅都唔得喇。
冇计喇，鬼叫港府无能咩，话就话将房屋问题列为施政重中之重，可惜有心无力，搞到房屋问题不断恶化，成为市民不可承受之重。好似房屋署研究将置富道侧前牧场遗址改建房屋咁吖，本来不失为增加房屋供应嘅途径，点知环保团体声称喺现场发现古迹、古树及濒危动物，要求保育为生态古迹公园，睇怕建屋计划随时又胎死腹中。呢个就系香港嘅现实，港府唔系唔想加快建屋，无奈管治弱势，阻力重重，要解决房屋问题仲难过登天。
咪怪功夫茶坦白，以港府呢种无能表现，房屋问题只会愈演愈烈，迟早连凶宅都无得剩吖！
App下载
