近排二手楼市好似畀人点咗穴咁，就算系用家主导嘅居屋市场都好冷清，不过虽则成交唔多，但系口价仲好硬净，最近又有新高价出现。其中沙田居屋愉翠苑三房自由市场卖咗728万元，追平咗屋苑保持嘅售价纪录，成为新界最贵居屋单位之一。至於北角健康村都有单位以468万元自由市场价卖咗，实用尺价14,268元，相信系港岛区居屋尺价次高。
刘Sir收到风，新界居屋王愉翠苑又做出新高价，今次单位系M座中层5室，实用面积663方尺，以自由市场价728万元登记成交，计番实用尺价约莫10,980元。
月内注册量值齐跌
今次呢口成交价，追平咗屋苑B座中层2室喺三月初以自 由市场价728万元登记售出嘅售价纪录，双双成为新界最高价居屋单位。
至於上述北角健康村康欣阁高层E室，实用面积328方尺，自由市场成交价468万元，实用尺价大约14,268元，料为港岛区居屋尺价次高纪录。
香港置业报告就提到，今个月至今，二手居屋注册量只有279宗，比上月同期少咗12%，总值暂录10.8亿元，按月同期亦少约13.2%。不过，该行伍创业预计，新一批白居二接受申请，相信可为市场注入新动力。
刘Sir同老友中原黄良升倾开，知道最近公屋成交都几淡静，佢话今年七月份嘅公屋第二市场买卖成交只系得大约14宗，总成交额约莫2,788.1万元。
公屋绿表买卖挫72%
对比番六月份录得嘅51宗同埋1.04亿元，足足减少咗大约72.5%同埋73.2%，宗数同总额仲创埋近五个月嘅低位。
黄良升话交投减少，反映股市波动，二手楼市气氛放缓，市民买楼意欲都减慢咗，所以公屋第二市场交投回落咗。用成交金额划分，期间冇任何楼价250万元以上嘅成交个案，而200万元以上至250万元嘅成交占8宗最多，但按月比较都减少一半。
而上个月买卖成交金额最高个案系黄大仙竹园北邨一个低层单位，成交价齐头250万元，其次蓝田德田邨中层单位就以234.3万元卖出咗。
刘Sir
App下载
