面对高楼价环境，市民置业真系要计过度过，加上上个月个股市咁波动，连居二市场啲买家都要睇定先入市。刘Sir发现七月公、居屋第二市场成交只得147宗，按月少咗23%。撇除二月春节因素，跌幅系旧年四月以来近十五个月最大。至於楼价就有升无跌，好似旺角富荣花园第二市场成交价高达630万元，系九龙居屋新高。
刘Sir睇见房委会及房屋署嘅最新数据，七月份一共有147宗公、居屋第二市场买卖个案，比起六月明显萎缩咗约莫23%。虽然成交系少咗，但系个价依然好硬净，好似期间富荣花园一个实用面积592方尺中层单位，成交价去到630万元，实用尺价10,642元，售价系九龙区第二市场新高价。
刘Sir收到风，呢个癫价单位系屋苑11座中层D室，原业主喺一○年七月用约285万元买入，揸咗五年帐面赚约345万元。至於香港仔逸港居有一个高层单位，实用面积592方尺，亦喺七月以545万元卖咗。售价创咗呢个盘第二市场价新高。
山景邨四年赚六倍
嚟番今个月，个市好似又好番啲。今个月首十五日公、居屋第二市场录到约38宗成交，比起上月同期就多咗大约65.2%，当中筲箕湾东涛苑第二市场实用尺价直逼万元大关，该盘一个实用面积406方尺单位，以405万元卖出，实用尺价9,980元系屋苑第二市场新高。
祥益地产李意铭话，屯门公屋山景邨近日录到一宗绿表成交，升幅仲相当唔错，个单位系2座高层22室，实用面积358方尺，以103.8万元居二市场价卖咗，实用尺价约2,899元，个单位系原业主一一年八月先以约14.64万元居二市场价买入，约四年升咗六倍，好过私楼。
珑门一房高见530万
私楼方面，受元朗地王效应带动，新界西北再爆惊人高价个案。美联谢志远话，珑门5座有个高层F室一房户，实用面积374方尺，以530万元卖出，实用尺价14,171元。刘Sir知道，呢口成交价破咗自己同YOHO MIDTOWN喺上个礼拜一齐录得嘅520万元旧纪录，创咗新界西北一房单位嘅二手新高价。
中原梁潮话，元朗翠韵华庭2座低层G室，因应同区地皮高价批出，有买家加多一成预算，以448万元成功买入个单位。
刘Sir
App下载
