近几年政府不断主动推出土地，发展商将增加土储嘅焦点转咗去卖地，收购旧楼重建嘅意欲愈嚟愈低，今年上半年申请强拍个案只系得5宗，比旧年同期跌咗差唔多40%，申请项目嘅市场估值总共都系得24亿左右，比旧年同期超过34亿元，跌咗约莫三成；有测量师老友同刘Sir讲，预计今年成年强拍申请会只系得10宗左右，将较去年大减逾50%。
刘Sir知道，今年上半年入禀土地审裁处嘅旧楼强拍申请得5宗，较旧年同期8宗，跌咗约莫37.5%，仲创咗一○年放宽旧楼强拍申请门槛后嘅新低。
恒地最积极占两宗
如果以申请宗数嚟睇，恒地（00012）最积极申请强拍，占咗2宗，分别系深水埗南昌街210至212号，同埋香港仔田湾街12至14号，两个都系属於中小型项目，涉及嘅楼面总共只有5.6万方尺，总共估值只系大约1.58亿元。
若果以金额计，上半年5宗强拍申请，总市值约莫系24亿元，较旧年上半年嘅34.68亿元，跌咗大约30%。
刘Sir仲知道，当中规模最大嘅系年初有财团就湾仔晏顿街、兰杜街及皇后大道东的宝华大厦多个地段向土地审裁处入禀申请强拍，涉及地盘面积达1.2万方尺，可建楼面约11.5万方尺，物业依家估值大约14.72亿元，市场估计进行收购嘅发展商好大机会系太古地产（01972）。
发展商宁投政府地
对於今年强拍申请宗数比旧年大减，第一太平戴维斯估值及专业顾问服务董事总经理陈超国认为，主要系因为政府积极推地，发展商通常舍难取易，倾向落标竞投政府土地，佢仲预计，今年全年大约得10宗强拍申请，比旧年少咗一半以上。
陈超国仲话，观塘道53至55A号启德大厦已完成咗聆讯程序，年内可获批强拍，有望成为历来最大规模强拍项目。刘Sir知道， 启德大厦呢个项目喺一三年已经申请强拍，涉及4幢7层高嘅旧楼，地盘面积约6.15万方尺。
刘Sir
App下载
