政府踏入新一季火速启动卖地计划，并会由「一铁一局」项目打头阵，头两个项目都由佢哋撑起，相信系近年罕见，合共提供接近2,000伙住宅，估值共约80亿元。刘Sir知道，西铁元朗站项目听日截收发展意向书，涉及约莫1,876伙，系今季最瞩目嘅住宅项目，市场估值最高超过74亿元；至於市区重建局嘅筲箕湾西湾河街重建项目，就会紧接喺后日截收意向，估值最高约6.24亿元。
刘Sir知道，「一铁一局」各有项目喺今个礼拜截收发展意向书，而焦点就会落喺听日截标嘅「重量级」元朗站项目，呢个项目由筹划至今大大话话超过十年，虽然仲有司法覆核诉讼隐忧，但系都无阻政府推地嘅决心。
呢个项目将提供约莫136.1万方尺住宅楼面，计划兴建6幢楼宇，提供唔少过1,876伙住宅单位，另亦有大约12.4万方尺嘅非住宅楼面，而商场部分就占大约10.7万方尺。
刘Sir老友第一太平戴维斯陈超国就话，政府加快推出元朗站，都反映咗佢哋增加私宅供应嘅决心。
诉讼隐忧或影响出价
提到项目有诉讼隐忧，佢就觉得对发展出价或多或少会有影响，估计每方尺楼面地价大约3,000元。
计番估值约莫44.56亿元，而项目现时嘅估值上限大约74.27亿元，即系每方尺楼面地价约5,000元。
西湾河街细码料抢手
至於后日截意向嘅市建局筲箕湾西湾河街项目，就只系属於「蚊型」规模，呢个地盘占地大约7,643方尺，住宅楼面约莫57,696方尺，将会提供大约120个单位，另会设有约莫6,459方尺嘅商业楼面。
理想城市张圣典话，呢个筲箕湾重建项目位处旧区又唔近海，所以周边环境会比较输蚀，但系项目嘅规模细，各类财团都有条件竞投，相信反应会相当踊跃。
张氏估计项目每方尺楼面地价约莫9,000元，计番估值就大约5.77亿元。而依家市场嘅最高估值大约6.24亿元左右。
刘Sir
App下载
