屯门扫管笏再有「准地王」喺今个礼拜五截标，今次截标嘅屯门第56区扫管笏路住宅地，提供超过84万方尺楼面，市场估值最高去到43.77亿元，有机会打破今个月中邻近管翠路创出嘅36.289亿元纪录，成为屯门区地价最高地皮。刘Sir觉得，喺区内有项目嘅新地（00016）、恒地（00012）同埋会德丰地产都有机会入标。
刘Sir知道，呢幅屯门扫管笏路住宅地，占地约莫29万方尺，总楼面就大约84.2万方尺，当中包括兴建一所面积约9,580方尺嘅幼稚园，总楼面就略多过最近批出嘅邻近管翠路地王，而地皮嘅高限系主水平基准以上90米，并须於二○二二年三月底前落成。
近海景靓 周五截标
今次呢幅地有番咁上下规模，地价有力问鼎屯门新地王宝座，刘Sir老友高纬环球张翘楚就话，扫管笏嘅位置近海，所以景观一般比较好，但区内已经有唔少住宅供应，但系长远嚟睇，扫管笏可以发展嘅空间唔多，预计项目每方尺楼面地价可以去到5,200元，计番估值就大约43.77亿元，系市场目前嘅估值上限。
其实屯门区近排先有新地王批出，邻近嘅管翠路住宅地喺今个月中以36.289亿元批出，刷新屯门地价新高纪录。如果即将截标嘅扫管笏路住地宅，最后真系顺利以上述估价批出，就会极速改写纪录，成为区内新地王。
刘Sir估计，啱啱夺得管翠路地皮嘅恒地、同埋区内有发展项目嘅新地同会德丰地产，都会有机会参与竞投。
斜坡有坟 吸引力降
不过，都有测量师觉得呢幅扫管笏路地皮嘅地价，未必及得上新近批出嘅管翠路地王，理想城市张圣典话，中标财团除咗要负责兴建幼稚园，亦需负责维修同埋保养项目范围内嘅斜坡，仲要移除现存嘅部分排污设施，而邻近嘅斜坡亦有坟地。佢预计，项目可作中低密度豪宅发展，预计每方尺楼面地价大概4,000元，估值约33.7亿元。
刘Sir
App下载
