近排有唔少新盘入伙，令到市场租盘多咗，所以早排租金都稍回落番，不过市场最近似乎已经适应咗。有代理话，本港100个大型屋苑嘅平均实用尺租，连跌两个月后稳定番落嚟，五月份报约32.7元，按月维持不变，相信暑假租务旺季会重拾升轨，平均实用尺价随时升穿33元嘅历史高位。
中原黄良升同刘Sir讲，根据佢哋新签租约统计，上个月全港100大型私人屋苑平均实用尺租约莫32.7元，同四月份一样无升跌。
虽然之前连跌咗两个月，但加埋跌咗唔够1%，所以依家尺租都算系高位横行，亦反映咗最近多个大型新盘入伙，带动租盘增加带来嘅租金调整期已经结束咗。
佢估计，嚟紧嘅暑假租务旺季，学生同家长嘅租屋需求都会增加，相信会刺激租务市场，估计租金会重拾升轨，整体平均实用尺租有机会升穿33元历史高位。
康怡上月升近3%标青
至於十大蓝筹屋苑，黄良升就话，其中有5个喺上月嘅租都录到升幅，以鰂鱼涌康怡花园嘅实用尺租升幅最显著，按月升咗约2.9%去到38.6元。
其次荔枝角美孚新邨都升咗约1.9%至31.4元，至於沙田第一城、鸭脷洲海怡半岛同蓝田滙景花园，租金按月升幅约莫0.9至1.4%。
睇番今年头5个月嘅租金走势，刘Sir老友美联刘嘉辉就话，期间嘅私宅平均实用尺租累升咗约2.4%，以佢哋公司嘅租务个案分析，头5个月月租1.5万元或以下嘅租务成交，占整体比例约39%，至於1.5万元以上至2万元则占约22.4%，净番约38.5%就系月租逾2万元嘅租务个案。
丽港城实尺36.4元新高
刘Sir知道，最近市场开始出现租金创新高嘅租务个案，市场消息话，蓝田丽港城19座低层B室，实用面积517方尺，啱啱以月租约莫1.88万元租出咗，计番实用尺租就大约36.4元，创咗屋苑分层标准户历史新高。
另外，香港置业曾家辉就话，长沙湾升悦居3座高层E室，实用面积459方尺细两房单位，刚刚以月租约1.75万元租出，实用尺租约38.1元属高价。
刘Sir
App下载
